នៅថ្ងៃទី២៤ ខែមេសា ឆ្នាំ២០២៥នេះ លេខាធិការដ្ឋានរៀបចំការបោះឆ្នោត ខេត្តសៀមរាប បើកវគ្គបណ្ដុះ បណ្តាល រយៈពេល០២ថ្ងៃ ចាប់ពីថ្ងៃទី២៤ ថ្ងៃទី២៥ ខែមេសា ឆ្នាំ២០២៥ ស្តីពី ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ ជូនដល់មន្ត្រី លេខាធិការដ្ឋានរៀបចំការបោះឆ្នោត តំណាងគណបក្សនយោបាយ សមាគម និងអង្គការមិនមែនរដ្ឋាភិបាល អាជ្ញាធរពាក់ព័ន្ធ ក្នុងខេត្តសៀមរាប។
លោក អ៊ាម ស៊ីណា អនុប្រធាន លេខាធិការដ្ឋានរៀបចំការបោះឆ្នោត ខេត្តសៀមរាប បានឲ្យដឹងថាវគ្គបណ្តុះបណ្តាលនាពេលនេះ ត្រូវបានរៀបចំជូន មន្ត្រី លេខាធិការដ្ឋានរៀបចំការបោះឆ្នោត តំណាងគណបក្ស នយោបាយ សមាគម និងអង្គការមិនមែនរដ្ឋាភិបាល និងភាគី ពាក់ព័ន្ធ ដើម្បីត្រៀមចូលរួម និងសហការអនុវត្តតាមភារកិច្ចរៀងៗខ្លួន សំដៅជំរុញ និងធានាឱ្យដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៥ ទទួលបានជោគជ័យ គោរពតាមច្បាប់ បទបញ្ជា នីតិវិធី និងលិខិតបទដ្ឋានគតិយុត្តផ្សេងទៀតជាធរមាន។
លោក អ៊ាម ស៊ីណា បានណែនាំឲ្យគ្រូឧទ្ទេសទាំងអស់ ធ្វើបទបង្ហាញដោយពន្យល់ និងបកស្រាយចំណុច នីមួយៗឱ្យបានច្បាស់លាស់ និងតាមវិធីសាស្ត្រងាយៗ ដើម្បីឱ្យសិក្ខាកាមឆាប់ចាំ និងឆាប់យល់។ និងលើកទឹកចិត្តដល់សិក្ខាកាមទាំងអស់ សូមចូលរួមក្នុងវគ្គបណ្តុះបណ្តាលនេះឱ្យបានពេញលេញ ដោយមិនត្រូវអវត្តមានឡើយប្រសិនបើមិនមានការចាំបាច់ ហើយត្រូវយកចិត្តទុកដាក់ត្រង់ត្រាប់ស្តាប់ និងកត់ត្រានូវរាល់ចំណុចសំខាន់ៗនៃមេរៀននីមួយៗ ព្រមទាំងលើកជាសំណួរចំពោះចំណុចណាដែលមានភាពមិនច្បាស់លាស់ ដើម្បីគ្រូឧទ្ទេស ធ្វើការបំភ្លឺជូន។
ផ្អែកតាមសេចក្តីសម្រេចលេខ ០០៤ គ.ជ.ប.ស.ស.រ ចុះថ្ងៃទី១០ ខែមករា ឆ្នាំ២០២៥ ការពិនិត្យបញ្ជីឈ្មោះ និងការចុះឈ្មោះបោះឆ្នោត និងការផ្តល់សុពល ភាពលើបញ្ជីបោះឆ្នោតផ្លូវការ ឆ្នាំ២០២៥ ត្រូវធ្វើចាប់ពីថ្ងៃទី១ ខែឧសភា រហូតដល់ថ្ងៃទី៣១ ខែកក្កដា ឆ្នាំ២០២៥ រីឯការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមឃុំ សង្កាត់ទូទាំង ប្រទេស មានរយៈពេល ២៦ថ្ងៃ ចាប់ពីថ្ងៃទី១ ដល់ថ្ងៃទី២៦ ខែឧសភា ឆ្នាំ២០២៥៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក ហាំ ម៉េងហួត
