មន្ត្រីរាជការ បុគ្គលិកអង្គការ សហគមន៍ និងអ្នកពាក់ព័ន្ធក្នុងខេត្តសៀមរាប បានទទួលការបណ្ដុះបណ្ដាលស្ដីពីការរៀបចំផែនការយុទ្ធសាស្ត្រសម្រាប់គម្រោងប្រព័ន្ធស្បៀង និងអាហារូបត្ថម្ភប្រចាំខេត្តសៀមរាប ដែលការបណ្ដុះបណ្ដាលនេះ មានរយៈពេល២ថ្ងៃ ចាប់ពីថ្ងៃទី២៤-២៥ ខែមេសា ឆ្នាំ២០២៥នេះ។
លោក ឡុង វ៉ាន់សាក់ ប្រធានការិយាល័យផែនការ នៃមន្ទីរផែនការខេត្ត បានឱ្យដឹងថា វគ្គបណ្ដុះបណ្ដាលនេះ គឺដើម្បីអភិវឌ្ឍសមត្ថភាពបន្ថែមដល់ក្រុមការងារតាមវិស័យ ក្នុងការរៀបចំផែនការសម្រាប់គម្រោងប្រព័ន្ធស្បៀង និងអាហារូបត្ថម្ភ ក៏ដូចជាសម្រាប់សកម្មភាពការងារស្នូលរបស់ខ្លួន ហើយវាក៏ជាវេទិកាក្នុងការចែករំលែកនូវលទ្ធផលនៃការរកឃើញពីបញ្ហារបស់ក្រុមការងារតាមវិស័យផងដែរ។ វគ្គបណ្ដុះបណ្ដាលនេះ ក៏ដើម្បីធ្វើឱ្យអស់លោកលោកស្រី ដែលជាសមាជិកក្រុមការងារទាំងអស់ អាចអភិវឌ្ឍសមត្ថភាព ចំណេះដឹង និងជំនាញបន្ថែម អំពីវិធីសាស្ត្រក្នុងការរៀបចំផែនការយុទ្ធសាស្ត្រសម្រាប់គម្រោង។
សូមបញ្ជាក់ថា វគ្គបណ្ដុះបណ្ដាលនៅពេលនេះដែរ គឺជាលើកទី៤ ដែលរៀបចំឡើងក្រោមគម្រោងប្រព័ន្ធស្បៀងប្រចាំខេត្តសៀមរាប ដោយមានការសម្របសម្រួលរបស់រដ្ឋបាលខេត្ត និងការជួយគាំទ្របច្ចេកទេសពីអង្គការហ្គ្រេត និងអង្គការអាគ្រីស៊ុត៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
