តាមរយៈចំណងមិត្តភាព មិត្តដែកថែប ភាគីចិន បានប្ដេជ្ញាចិត្តខ្ពស់ រួមគ្នាជាមួយកម្ពុជាពង្រឹងការផ្លាស់ប្ដូរវប្បធម៌ និងប្រជាជន ជាពិសេសជំរុញកិច្ចខិតខំប្រឹងប្រែងប្រឆាំងអំពើពុករលួយឆ្លងដែន ដើម្បីទទួលលទ្ធផលជាច្រើនក្នុងការប្រឆាំងអំពើពុករលួយ និងកសាងបរិយាកាសសង្គមស្អាតស្អំរវាងប្រទេសកម្ពុជា និងចិន។
ក្នុងដំណើរទស្សនកិច្ចនៅមន្ទីរអធិការកិច្ចខេត្តសៀមរាប នាថ្ងៃទី២៥ ខែមេសា ឆ្នាំ២០២៥នេះ លោក ឡី កាង (Lei Gang) សមាជិកអចិន្ត្រៃយ៍នៃគណៈត្រួតពិនិត្យកិច្ចការរដ្ឋចិន ខេត្តយូណាន បង្ហាញថា ប្រទេសកម្ពុជា-ចិន ជាបងប្អូនដែលចេះជួយគ្នា និងចេះចែករំលែកគ្នា ពិសេសថ្នាក់ដឹកនាំខេត្តយូណាន និងខេត្តសៀមរាប ក៏តែងតែផ្លាស់ប្ដូរទស្សនកិច្ចទៅវិញទៅមក និងមានទំនាក់ទំនងជិតស្និទ្ធល្អប្រសើរថែមទៀតផង។ ជាងនេះទៅទៀត គឺកិច្ចសហប្រតិបត្តិការលើវិស័យកសិកម្ម វប្បធម៌ ទេសចរណ៍ និងការអប់រំជាដើម។
លោក ឡី កាង បន្តថា ក្រោមការដឹកនាំរបស់គណៈអធិការកិច្ចវិន័យមជ្ឈិមបក្សកុម្មុយនីស្ដចិន និងគណៈត្រួតពិនិត្យកិច្ចការរដ្ឋចិន និងមានការណែនាំពី ឯកឧត្តម Xi Jinping ប្រធានាធិបតីចិន ការអនុវត្តការងារប្រឆាំងអំពើពុករលួយ និងការត្រួតពិនិត្យរដ្ឋាភិបាលស្អាតស្អំ ត្រូវបានអនុវត្តយ៉ាងតឹងរ៉ឹង ពង្រឹងកិច្ចសហប្រតិបត្តិការអន្តរជាតិក្នុងការប្រឆាំងអំពើពុករលួយ និងបរិស្ថានសង្គមស្អាតសម្រាប់ការអភិវឌ្ឍសេដ្ឋកិច្ចក្នុងតំបន់។
លោក លឹម ភក្ដី ប្រធានមន្ទីរអធិការកិច្ចខេត្ត បង្ហាញថា មន្ទីរមានភារកិច្ចរៀបចំផែនការយុទ្ធសាស្ដ្រ ផែនការសកម្មភាព ផែនការថវិកា និងផែនការប្រតិបត្តិ គ្រប់គ្រង និងសម្របសម្រួលការងាររដ្ឋបាល ពិធីការ បុគ្គលិក ធនធានមនុស្ស គណនេយ្យហិរញ្ញវត្ថុ ផែនការ ស្ថិតិសម្ភារ បរិក្ខារ និងសារពើភណ្ឌ។ ក្រៅពីនោះ មន្ទីរក៏មានតួនាទីគ្រប់គ្រង និងសម្របសម្រួលការងារអធិការកិច្ច តាមដានការអនុវត្តច្បាប់ ទទួលពិនិត្យ និងដោះស្រាយបណ្ដឹង ទទួលពាក្យបណ្ដឹងរបស់ប្រជាពលរដ្ឋ និងពិនិត្យសមត្ថកិច្ច ដើម្បីចុះក្ដាប់សភាពការណ៍ ឬបញ្ជូនទៅអង្គភាពមានសមត្ថកិច្ច។
លោកក៏បានស្នើដល់ប្រតិភូចិន បន្តជំរុញការផ្លាស់ប្ដូរបទពិសោធ និងជំរុញអ្នកវិនិយោគធំៗ ឱ្យមកវិនិយោគនៅប្រទេសកម្ពុជា ពីសេសខេត្តសៀមរាប ឱ្យបានច្រើន ព្រមទាំងជួយផ្សព្វផ្សាយអំពីវប្បធម៌ អរិយធម៌ ខ្មែរដល់ជនជាតិចិន ដើម្បីឱ្យមកទស្សនាប្រាង្គប្រាសាទអង្គរ លើទឹកដីខេត្តសៀមរាប ផងដែរ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
