នៅព្រឹកថ្ងៃទី២៩ ខែមេសា ឆ្នាំ២០២៥ ប្រជាពលរដ្ឋខ្វះខាតជិត២០គ្រួសារ នៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ទទួលបានអំណោយពីសប្បុរសជន ដើម្បីជួយសម្រួលដោះស្រាយជីវភាពប្រចាំថ្ងៃ។
សប្បុរជន លោក ឃន់ សុខន បានលើកឡើងថា អំណោយទាំងនេះ មានអង្ករ និងថវិកាមួយចំនួន គឺបានទទួលពីសប្បុរសជននៅក្នុងស្រុក ហើយមានអាជ្ញាធរភូមិសង្កាត់ នាំយកទៅចែកជូនប្រជាពលរដ្ឋដែលមានជីវភាពខ្វះខាតកំពុងរស់នៅសំណង់មិនរៀបរយចំនួន១៦គ្រួសារ ស្ថិតនៅភូមិបុស្សក្រឡាញ់។ លោកបន្ដថា អំណោយនេះបន្ដិចបន្តួចក៏ពិតមែន ប៉ុន្ដែអាចជួយសម្រួលក្នុងជីភាពគ្រួសារដែលកំពុងជួបការខ្វះខាតបានមួយចំនួនផងដែរ។
លោកបានបន្ថែមថា ការបរិច្ចាកពីទឹកចិត្ដសប្បុរសជន ក្នុងគោលដៅដើម្បីចូលរួមក្នុងការងារសង្គមជាមួយរាជរដ្ឋាភិបាល ក្នុងការជួយសម្រួលដល់បងប្អូនប្រជាពលរដ្ឋលើបញ្ហាខ្វះខាត។
ជាមួយគ្នានោះដែរលោក ទុំ ពាត ចៅសង្កាត់រងទី១នៃសង្កាត់ជ្រាវ បានមានប្រសាសន៍ថ្លែងអំណរគុណចំពោះទឹកចិត្តដ៏សប្បុរសធម៌ របស់សប្បុរសជននានាដែលបានយកចិត្តទុកដាក់ និងគិតគូរពីសុខទុក្ខ ការលំបាករបស់គ្រួសារខ្វះខាតនៅមូលដ្ឋាន ដែលនេះជាសកម្មភាពមនុស្សធម៌ជួយចែករំលែក ដល់អ្នកកំពុងមានតម្រូវការចាំបាច់ក្នុងជីវភាពប្រចាំថ្ងៃពិតប្រាកដមែន។
ព័ត៌មានជាតិ ថ្មីៗ
លោកសង្កាត់រង ក៏បានលើកទឹកចិត្ត និងជំរុញឲ្យពូកគាត់បញ្ជូនកូនៗចូលសិក្សាររៀនសូត្រឲ្យបានគ្រប់ៗគ្នា ដើម្បីអនាគតពួកគាត់មានភាពរុងរឿង មានចំណេះដឹង និងសមត្ថភាពពេញលេញ ងាយស្រួលរកការងារធ្វើ ក្លាយជាធនធានមនុស្សដ៏មានសក្តានុពល សម្រាប់រួមចំណែកអភិវឌ្ឍសេដ្ឋកិច្ចគ្រួសារក៏ដូចជាសង្គមជាតិផងដែរ។
អត្ថបទ និងរូបភាព ៖លោក ឈិត សាវី
កែសម្រួល៖ លោក ហាំ ម៉េងហួត
