ក្រសួងសង្គមកិច្ច អតីតយុទ្ធជន និងយុវនីតិសម្បទា សហការជាមួយក្រសួងទេសចរណ៍ គ្រោងនឹងបើកវគ្គបណ្ដុះបណ្ដាលវិក្រឹត្យការដល់ជនមានពិការភាពភ្នែក លើជំនាញម៉ាស្សា និងស្ប៉ា កម្រិតអាស៊ាន ដើម្បីបំប៉នសមត្ថភាពបន្ថែមដល់ជនមានពិការភាពភ្នែកប្រកបមុខរបរផ្នែកម៉ាស្សា នៅសមាគមសំនៀងជនពិការឱ្យពួកគាត់មានជំនាញច្បាស់លាស់ស្របតាមស្ដង់ដា និងឱកាសទទួលបានការងារនៅតាមបណ្ដាលប្រទេសក្នុងតំបន់អាស៊ាន។
នេះបើតាមការបញ្ជាក់របស់ ឯកឧត្តម ចាប តូ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងឱកាសជួបសំណេះសំណាលជាមួយបងប្អូនជនមានពិការភាពភ្នែក ប្រកបមុខរបរផ្នែកម៉ាស្សាដៃទេព នៅមន្ទីរសង្គមកិច្ចខេត្តសៀមរាប នាថ្ងៃទី២៩ ខែមេសានេះ ដោយមានការចូលរួមពី លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី និងថ្នាក់ដឹកនាំជាច្រើនរូបទៀតផងដែរ។
ឯកឧត្តម ចាប តូ មានប្រសាសន៍ថា ដើម្បីជំរុញការយកចិត្តទុកដាក់ចំពោះបងប្អូនជាជនមានពិការភាព រាជរដ្ឋាភិបាលកម្ពុជា បានរៀបចំ និងបង្កើតគោលនយោបាយ យន្តការ ច្បាប់នានាជាច្រើន ដើម្បីជួយសម្រួលដល់ជីវភាពជនមានពិការភាព ដូចជាផ្ដល់បណ្ណមូលនិធិសមធម៌សុខាភិបាល កម្មវិធីអត្តសញ្ញាណកម្មគ្រួសារក្រីក្រ ការស្នើសុំសេវាសុខាភិបាលដោយឥតគិតថ្លៃ ការបង្កើតបេឡាជាតិអតីតយុទ្ធជន ជាពិសេសផ្ដល់នូវកម្មវិធីនានាពាក់ព័ន្ធជំនាញវិជ្ជាជីវៈ ដើម្បីឱ្យពួកគាត់មានការងារ មុខរបរ ជួយដល់ជីវភាពរស់នៅប្រចាំថ្ងៃរបស់ពួកគាត់។
សូមជម្រាបថា ក្នុងឱកាសនោះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ក៏បានផ្ដល់អំណោយដល់ជនមានពិការភាពភ្នែកប្រកបមុខរបរផ្នែកម៉ាស្សាដៃទេព ចំនួន២២នាក់ ដោយក្នុងម្នាក់ទទួលបាន អង្ករ១០គីឡូ ត្រីខ១យួរ ទឹកស៊ីអ៊ីវ១យួរ មី១កេស សារុង១ ឈើច្រត់១ និងថវិកា ៥០០០០រៀល។
បើតាមលោក គង់ សំអឿន ប្រធានមន្ទីរសង្គម កិច្ចអតីតយុទ្ធជន និងយុវនីតិសម្បទាខេត្តសៀមរាប បានឱ្យដឹងថា ជនពិការភាពផ្នែកកាយសម្បទា ពិការញ្ញាណដឹង ពិការសតិបញ្ញា ពិការផ្លូវចិត្ត និងពិការផ្សេងៗទៀត នៅទូទាំងខេត្តសៀមរាប មានចំនួន ១៨ ៩៣៨នាក់ ក្នុងនោះជនមានពិការភាពចំនួន ២ ៦៥១នាក់ ទទួលបានប្រាក់ឧបត្ថម្ភពីកម្មវិធីជាតិជំនួយសង្គមផងដែរ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
