នាព្រឹកថ្ងៃទី៣០ ខែមេសា ឆ្នាំ២០២៥នេះ សាលាឆាន់ថ្មីមួយខ្នងនៅក្នុងវត្តព្រះសិអារ្យវត្តព្រះសិអារ្យដែលស្ថិតនៅបរិវេណប្រាសាទបាយ័ន ភូមិគោកតាចាន់ សង្កាត់គោកចក ក្រុងសៀមរាប ត្រូវបានធ្វើពិធីបញ្ចុះបឋមសិលាដើម្បីធ្វើការសាងសង់ ក្រោមវត្តអញ្ជើញចូលរួមពីសំណាក់ ឯកឧត្ដមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និង ឯកឧត្តម ប្រាក់ សោភ័ណ អភិបាលនៃគណៈអភិបាល ខេត្តសៀមរាប រួមនឹងវត្តមាន ឯកឧត្តម លោកជំទាវ លោក លោកស្រី ជាថ្នាក់ដឹកនាំខេត្ត មន្ទីរអង្គភាព និងពុទ្ធបរិស័ទជិតឆ្ងាយជាច្រើនរូប ។
ព្រះយសោធរញាណ ឡោម សុឈាត ព្រះគ្រូចៅអធិការវត្តព្រះសិអារ្យ បានមានថេរដីកាថា ការកសាងសាលាឆាន់នៅក្នុងវត្តព្រះសិអារ្យនេះ ត្រូវបានផ្តួចផ្តើមឡើងដោយទឹកចិត្តសទ្ធាជ្រះថ្លាមុតមាំក្នុងព្រះពុទ្ធសាសនារបស់អាចារ្យ គណកម្មការ រួមជាមួយបងប្អូនពុទ្ធបរិស័ទចំណុះជើងវត្ត និងពុទ្ធបរិស័ជិតឆ្ងាយ ព្រមទាំងមានការគាំទ្រឡើងដោយឯកឧត្ដមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រី ឯកឧត្តម ប្រាក់ សោភ័ណ រួមនិងឯកឧត្តម លោកជំទាវ លោកលោកស្រី ជាសប្បុរសជនជាច្រើនទៀត ដើម្បីកសាងសាលាឆាន់ថ្មី ១ខ្នងដែលមានប្រវែង បណ្តោយ ២២ម៉ែត្រ និងទទឹង១៥ម៉ែត្រ ដែលគ្រោងចំណាយថវិកាអស់ប្រមាណជិត១០ម៉ឺនដុល្លារ ។
ជាមួយគ្នានេះដែរ ក្នុងនាមអាជ្ញាធរខេត្ត ឯកឧត្តម ប្រាក់ សោភ័ណ អភិបាលខេត្តសៀមរាប បានថ្លែង អំណរគុណដល់ឯកឧត្ដមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងលោកជំទាវ ព្រមទាំង ឯកឧត្តម លោកជំទាវ លោកលោកស្រី ជាសប្បុរសជន និងពុទ្ធបរិស័ទជិតឆ្ងាយ គ្រប់ទិសទីដែលបានខិតខំប្រឹងប្រែងចូលរួមចំណែកនូវធនធាន ថវិកា ក្នុងការកសាងសមិទ្ធផលសាលាឆាន់ថ្មីមួយនេះឡើងដែល សម្រាប់បម្រើក្នុងវិស័យព្រះពុទ្ធ។
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក ហាំ ម៉េងហួត
