នាព្រឹកថ្ងៃទី៣០ ខែមេសា ឆ្នាំ២០២៥នេះ ក្រុមហ៊ុនមកពីប្រទេសកូរ៉េ បានជួបពិភាក្សាជាមួយអាជ្ញាធរខេត្តសៀមរាប ដើម្បីពិនិត្យ និងពិភាក្សា ស្តីពីការសិក្សាទីតាំងដីក្នុងការវិនិយោគលើវិស័យ កីឡាអេឡិចត្រូនិក(E-sport) ក្នុងខេត្តសៀមរាប ដែលតំណាងក្រុមហ៊ុន Esport Holding មកពីប្រទេសកូរ៉េ បានឲ្យដឹងថា បន្ទាប់ពីទទួលបានជោគជ័យនៅក្នុងបណ្តាប្រទេសធំៗមួយចំនួន ក្រុមហ៊ុនមានបំណងពង្រីកនូវការលេងកីឡាប្រភេទថ្មីនេះ នៅកម្ពុជា ដោយក្នុងនោះក្រុមហ៊ុនបានសម្លឹងទីតាំងចំនួន២ គឺនៅរាជធានីភ្នំពេញ និងនៅខេត្តសៀមរាប។
លោកតំណាងក្រុមហ៊ុន ឲ្យដឹងទៀតថា សម្រាប់ខេត្តសៀមរាប ដែលជាខេត្តទេសចរណ៍ដ៏សំខាន់របស់កម្ពុជានោះ វាក៏ជាឱកាសមួយនៅក្នុងការផ្សព្វផ្សាយសក្តានុពលទេសចរណ៍របស់ខ្លួនតាមរយៈព្រឹត្តិការណ៍កីឡានានាផងដែរ។ លោកបានបន្តថា កីឡាអ៊ីស្ប៉ត មិនមែនជាប្រភេទល្បែងពន្វក់ស្មារតីនោះទេ ប៉ុន្តែវាជាប្រភេទកីឡាដែលទាមទារឲ្យអ្នកប្រកួតមានការហ្វឹកហាត់ច្បាស់លាស់ សម្រាប់ការប្រកួត ដោយប្រភេទកីឡាថ្មីមួយនេះ ត្រូវបានទទួលស្គាល់ជាសាកល ក្នុងនោះកីឡាអ៊ីស្ប៉តត្រូវបានដាក់បញ្ចូលជាវិញ្ញាសារកីឡាក្នុងព្រឹត្តិការណ៍លំដាប់ពិភពលោកផងដែរ។
ព័ត៌មានជាតិ ថ្មីៗ
ក្នុងឱកាសនេះដែរ លោក លី សារី អភិបាលរងខេត្តសៀមរាប បានសម្តែងនូវការស្វាគមន៍យ៉ាងកក់ក្តៅចំពោះការជ្រើសរើសយកខេត្តសៀមរាប សម្រាប់ជាទីតាំងវិនិយោគ។ លោកបន្តថា នៅខេត្តសៀមរាបក្រៅពីវិស័យទេសចរណ៍ ខេត្តក៏មានសក្តានុពលផ្សេងៗជាច្រើនដែលបង្កបរិយាកាសល្អ ដល់អ្នកវិនិយោគមកពីបណ្តាប្រទេសនានា ដូចជាអាកាសយានដ្ឋានអន្តរជាតិសៀមរាបអង្គរ ដែលអាចទទួលបាននូវការចុះចតរបស់យន្តហោះធំៗ ជាមួយនេះ រាជរដ្ឋាភិបាលក៏មានគម្រោងសាងសង់ផ្លូវល្បឿនលឿន និងផ្លូវរថភ្លើងជាដើម ដែលនេះសុទ្ធជាការបង្កលក្ខណៈងាយស្រួលដល់ការវិនិយោគ នៅក្នុងខេត្តសៀមរាប។
លោកអភិបាលរងខេត្តសៀមរាប ក៏បានបង្ហាញក្តីរំពឹងថា ការចូលរួមរបស់វិស័យឯកជននេះ នឹងជួយរួមចំណែកធំ ដល់ការផ្សព្វផ្សាយទេសចរណ៍កីឡា ដែលអាចទាក់ទាញកីឡាករមកពីគ្រប់ទិសទីចូលមកកាន់ប្រទេសកម្ពុជា ជាពិសេសខេត្តសៀមរាប ។ ប៉ុន្តែបើទោះជាយ៉ាងនេះក្តី លោកអភិបាលរងក៏បានជំរុញដល់ភាគីក្រុមហ៊ុនត្រូវគោរពនូវគោលការណ៍ច្បាប់ និងលិខិតបទដ្ឋានគតិយុត្តិនានារបស់កម្ពុជាផងដែរ៕
សូមជម្រាបផងដែរ នៅកម្ពុជា សហព័ន្ធកីឡាអេឡិចត្រូនិកកម្ពុជា អក្សរកាត់ «សអក»ត្រូវបានបង្កើតឡើងនៅឆ្នាំ២០១៤ ហើយត្រូវបានទទួលស្គាល់ជាផ្លូវការដោយគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា ព្រមទាំងជាសមាជិកពេញសិទ្ធិរបស់សហព័ន្ធកីឡាអេឡិចត្រូនិកអាស៊ីអាគ្នេយ៍ សហព័ន្ធកីឡាអេឡិចត្រូនិកអាស៊ី និងសហព័ន្ធកីឡាអេឡិចត្រូនិកអន្តរជាតិផងដែរ។
អត្ថបទ និងរូបភាព ៖លោក ជា ស្រស់
កែសម្រួល ៖ លោក ហាំ ម៉េងហួត
