នៅថ្ងៃទី២៩ ខែមេសា ឆ្នាំ២០២៥នេះ ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប ដោយមានការចូលរួមពីតំណាងក្រសួងស្ថាប័នពាក់ព័ន្ធ បានបើកកិច្ចប្រជុំពិភាក្សាបច្ចេកទេសអន្តរក្រសួងលើរបាយការណ៍បច្ចុប្បន្នភាព ស្តីពីការកំណត់តំបន់ការពារ និងអភិវឌ្ឍប្រភពទឹកបឹងទន្លេសាប សម្រាប់ផ្គត់ផ្គង់ទឹកស្អាត ក្នុងក្រុងសៀមរាប និងតំបន់ជុំវិញ ខេត្តសៀមរាប។
កិច្ចប្រជុំនេះដែរ គឺដើម្បីធ្វើការពិនិត្យ និងពិភាក្សាបច្ចេកទេសលម្អិត ជាមួយមន្ត្រីរដ្ឋាករទឹកស្វយ័តសៀមរាប និងមន្ត្រីបច្ចេកទេសអង្គភាពជំនាញពាក់ព័ន្ធ លើរបាយការណ៍បច្ចុប្បន្នភាពរបស់រដ្ឋាករទឹក និងបានគិតគូរដល់ផលប៉ះពាល់ ដែលអាចកើតមានដោយសារការកំណត់ទីតាំង និងទំហំតំបន់ការពារ និងអភិវឌ្ឍន៍ប្រភពទឹក និងពិនិត្យអំពីប្រភពបំពុលគុណភាពទឹក ផលប៉ះពាល់លម្ហនេសាទសាធារណៈ និងចរាចរណ៍ឆ្លងកាត់។
ក្នុងនោះដែរ អង្គប្រជុំបានឯកភាពគ្នាជាគោលការណ៍កម្រិតបច្ចេកទេសឈានទៅដល់ការរៀបចំសេចក្តីព្រៀងកំណត់តំបន់ការពារប្រភពទឹក និងស្នើឱ្យរដ្ឋាករទឹកស្វយ័តសៀមរាប ធ្វើការវិភាគគុណភាពទឹកអណ្តូងដែលនៅជិតស្ថានីយបូមទឹកឆៅបឹងទន្លេសាបលើប៉ារ៉ាម៉ែត្រសំខាន់ៗ និងរៀបចំជារបាយការណ៍ និងបែបបទបច្ចេកទេសជាជម្រេីសជូនថ្នាក់ដឹកនាំ និងប្រមុខរាជរដ្ឋាភិបាលសម្រេច។
ព័ត៌មានជាតិ ថ្មីៗ
សូមជម្រាបថា យុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា គឺមានអាទិភាពគន្លឹះចំនួន៥ គឺមនុស្ស ផ្លូវ ទឹក ភ្លើង និងបច្ចេកវិទ្យា។ ក្នុងនោះតម្រូវការក្នុងការប្រើប្រាស់ទឹកលើគ្រប់វិស័យដែលបឹងទន្លេសាបមានតួនាទីសំខាន់ រួមជាមួយបណ្តាដៃអាងស្ទឹងទាំង១១ នៅជុំវិញបឹងទន្លេសាប ជាពិសេសតម្រូវការលើផ្នែកកសិកម្ម និងការផ្គត់ផ្គង់ទឹកស្អាត ព្រមទាំងបានគិតគូរពីបញ្ហាប្រឈមនានាមកលើបឹងទន្លេសាបក្នុងពេលបច្ចុប្បន្ន រួមទាំងកត្តាប្រែប្រួលអាកាសធាតុនាពេលអនាគតផងដែរ៕
ប្រភព៖ អាជ្ញាធរទន្លេសាប
