តាមរបាយការណ៍លេខាធិការដ្ឋានអេដស៍ខេត្តសៀមរាប គិតត្រឹមត្រីមាសទី១ ឆ្នាំ២០២៥នេះ ខេត្តសៀមរាប បានរកឃើញករណីអ្នកវិជ្ជមានមេរោគអេដស៍ថ្មីចំនួន ៨៣នាក់ ខណៈនៅឆ្នាំ២០២៤ មានមនុស្ស ៣៤៣នាក់ បានចុះបញ្ជីព្យាបាល និងអ្នកជំងឺដែលបានកំពុងទទួលសេវាថែទាំព្យាបាលដោយឱសថប្រឆាំងមេរោគមានចំនួន ៥ ១០៧នាក់។
របាយការណ៍ដដែល បានឱ្យដឹងថា សម្រាប់ឆ្លងថ្មីមានការថយចុះគួរឱ្យកត់សម្គាល់ពី ១៥ ០០០ករណីក្នុងឆ្នាំ១៩៩៦ និងឆ្នាំ១៩៩៧ មកត្រឹមតែ ១ ២០០នាក់ ក្នុងឆ្នាំ២០២៣។ លទ្ធផលនៃការធ្វើតេស្ត និងការព្យាបាលថ្នាក់ជាតិ បានឈានដល់កម្រិត ៨៩-៩៨-៩៨ ក្នុងឆ្នាំ២០២៣ ស្របទៅនឹងគោលដៅ ៩៥-៩៥-៩៥
ដែលតួលេខនេះត្រូវបានអង្គការ UNAIDS ដាក់ប្រទេសកម្ពុជា នៅលេខទី១០ ក្នុងចំណោម១៩៥ប្រទេស ទូទាំងពិភពលោកដែលសម្រេចបាននូវការបង្ក្រាបមេរោគជាង ៨៦% ក្នុងចំណោមអ្នកផ្ទុកមេរោគអេដស៍។
ក្នុងកិច្ចប្រជុំសម្របសម្រួល និងផ្សព្វផ្សាយការអនុវត្តនីតិវិធីផ្ដល់បណ្ណមូលនិធិសមធម៌សុខាភិបាល សម្រាប់បុគ្គលបម្រើក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធក្នុងការឆ្លើយតបនឹងមេរោគអេដស៍ និងជំងឺអេដស៍ នៅខេត្តសៀមរាប នាថ្ងៃទី២៩ ខែមេសានេះ ឯកឧត្តម ទេសរដ្ឋមន្ត្រី អៀង ម៉ូលី ប្រធានអាជ្ញាធរជាតិប្រយុទ្ធនឹងជំងឺអេដស៍ មានប្រសាសន៍ថា ទោះស្ថិតក្នុងលេខរៀងទី១០ ទូទាំងពិភពលោក ប៉ុន្តែនៅពេលដែលពេលវេលាកាន់តែវិវត្តទៅមុខ មេរោគអេដស៍ ត្រូវបានព្យាករណ៍ថាកើនឡើងក្នុងចំណោមមនុស្សវ័យក្មេង ដែលក្នុងរយៈកាល៦ឆ្នាំទៅមុខ គេបានប៉ាន់ប្រមាណថានឹងមានមនុស្ស ៧២០០នាក់ ឆ្លងមេរោគអេដស៍ថ្មី ដែលពាក់កណ្ដាលនៃពួកគេ គឺជាបុគ្គលដែលមានអាយុពី ១៥-២៤ឆ្នាំ។ បុគ្គលទាំងនេះនឹងត្រូវការការព្យាបាលដោយថ្នាំប្រឆាំងមេរោគអេដស៍ (ART) លើសពី៥០ឆ្នាំ ដែលបង្កើតជាបន្ទុកសេដ្ឋកិច្ចយ៉ាងធំសម្រាប់កម្ពុជា។
ព័ត៌មានជាតិ ថ្មីៗ
ឯកឧត្តម ទេសរដ្ឋមន្ត្រី បន្តថា តាមរយៈបញ្ហានេះ ការផ្ដល់បណ្ណមូលនិធិសមធម៌សុខាភិបាល គឺមានសារៈសំខាន់សម្រាប់ការគាំទ្រដល់ប្រជាជនគន្លឹះ ក្នុងការទទួលបានសេវាមេរោគអេដស៍ និងសុខភាព ជាពិសេសការព្យាបាលជំងឺកាមរោគ។ នេះគឺជាគំនិតផ្ដួចផ្ដើម ឈ្នះ ឈ្នះ ដោយសាររាជរដ្ឋាភិបាលកម្ពុជា រ៉ាប់រងការចំណាយពាក់ព័ន្ធទាំងអស់សម្រាប់ទាំងប្រជាជនគន្លឹះ ចំណែកឯអ្នកផ្ដល់សេវាថែទាំសុខភាពក៏នឹងទទួលកំរៃសេវាដែលគេបានផ្ដល់។ នៅពេលដែលពួកគេបានចុះឈ្មោះ និងមានបណ្ណសមធម៌នេះ ពួកគេអាចចូលប្រើសេវាថែទាំសុខភាពសំខាន់ៗបានយ៉ាងងាយស្រួល ជាពិសេសការព្យាបាលការឆ្លងមេរោគកាមរោគ (STIs) ដែលអាចកាត់បន្ថយហានិភ័យនៃការចម្លងមេរោគអេដស៍បានបីដង។
លោក នាក់ ណេរ៉ុន អភិបាលរងខេត្ត និងជាប្រធានគណៈកម្មាធិការប្រយុទ្ធនឹងជំងឺអេដស៍ខេត្តសៀមរាប បានបង្ហាញឆន្ទៈខ្ពស់ក្នុងការអនុវត្តគម្រោងពន្លឿនការឆ្លើយតបបញ្ចប់មេរោគអេដស៍ ជំងឺអេដស៍ តាមរយៈយន្តការពហុវិស័យខេត្ត ការរៀបចំធ្វើបច្ចុប្បន្នភាពឡើងវិញនូវសមាសភាពគណៈកម្មធិការប្រយុទ្ធនឹងជំងឺអេដស៍ខេត្ត និងផែនការយុទ្ធសាស្ត្រពន្លឿនការឆ្លើយតបបញ្ចប់មេរោគអេដស៍ ជំងឺអេដស៍ជាដើម៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
