នៅព្រឹកថ្ងៃទី២៩ ខែមេសា ឆ្នាំ២០២៥នេះ ឧបដ្ឋានសាលាពីរខ្នង ក្នុងវត្តប្រាសាទលលៃ ស្រុកប្រាសាទបាគង ខេត្តសៀមរាប ត្រូវបានរៀបចំពិធីបញ្ចុះបឋមសិលាសាងសង់ជាផ្លូវការ ក្រោមអធិបតីភាព លោកជំទាវឧកញ៉ា សិរីករុណាបទុមរតន៍ អគ្គមហាឧបាសិកាពុទ្ធសាសនូបត្ថម្ភក៍បណ្ឌិត ម៉ៅ ម៉ាល័យ កែ គឹមយ៉ាន ដោយមានការនិមន្តចូលរួមពីព្រះសង្ឃ អាជ្ញាធរមូលដ្ឋាន លោកគ្រូអ្នកគ្រូ លោកយាយលោកតា សិស្សានុសិស្ស និងប្រជាពលរដ្ឋជាច្រើនអង្គនាក់។
ព្រះគ្រូ យឿម យ៉ានី ចៅអធិការវត្តប្រាសាទលលៃ មានសង្ឃដិកាឱ្យដឹងថា វត្តប្រាសាទលលៃ (ហៅវត្តលលៃ) ស្ថិតនៅក្នុងឃុំបាគង ស្រុកប្រាសាទ បាគង ខេត្តសៀមរាប បានបង្កើតឡើងចាប់ពីចុងសតវត្សរ៍ទី១៤ ដោយរាប់ចាប់ពីពេលនោះមកព្រះចៅអធិការមានច្រើនរូប។ សម្រាប់ឧបដ្ឋានសាលាថ្មី ដែលរៀបចំពិធីបញ្ចុះបឋមសិលាសាងសង់នាពេលនេះ មានទំហំបណ្ដោយ២៥ និងទទឹង២៤ម៉ែត្រ ក្រោមការជួយជ្រោមជ្រែងពីបងប្អូនពុទ្ធបរិស័ទជិតឆ្ងាយ ជាពិសេសលោកជំទាវឧកញ៉ា បណ្ឌិត ម៉ៅ ម៉ាល័យ កែ គឹមយ៉ាន ផងដែរ។
ព័ត៌មានជាតិ ថ្មីៗ
ក្នុងឱកាសនោះ លោកជំទាវ ឧកញ៉ាបណ្ឌិត ម៉ៅ ម៉ាល័យ កែ គឹមយ៉ាន បានសម្ដែងសេចក្ដីជ្រះថ្លា និងរីករាយ ដែលចូលរួមជាមួយបងប្អូនក្នុងពិធីបញ្ចុះបឋមសិលាសាងសង់ឧបដ្ឋានសាលាថ្មី នៃវត្តប្រាសាទលលៃ នាពេលនេះ ដែលជាបង្ហាញឱ្យឃើញពីសាមគ្គីភាពមួយប្រជាជាតិខ្មែរ ក្នុងការចូលរួមកសាងសមិទ្ធផលថ្មីៗសម្រាប់វិស័យព្រះពុទ្ធសាសនា ក្នុងប្រទេសកម្ពុជាយើង។ លោកជំទាវបន្តថា ក្រៅពីសមិទ្ធផលនាឧបដ្ឋានសាលាថ្មីនេះ លោកជំទាវនឹងបន្តចូលរួមអភិវឌ្ឍសមិទ្ធផលបន្ថែមទៀតក្នុងវត្តបូរាណមួយនេះ និងបណ្ដាវត្តដដៃទៀត សម្រាប់បម្រើដល់វិស័យព្រះពុទ្ធសាសនានៃយើង។
ក្នុងនាមអាជ្ញាធរមូលដ្ឋាន លោក ជួន ភារម្យ អភិបាលរងស្រុក បានថ្លែងអំណរគុណដល់ លោកជំទាវ ឧកញ៉ាបណ្ឌិត ម៉ៅ ម៉ាល័យ កែ គឹមយ៉ាន រួមនឹងបងប្អូនពុទ្ធបរិស័ទជិតឆ្ងាយ ដែលបានចូលរួមនូវធនធានដើម្បីកសាងសមិទ្ធផលថ្មីមួយនេះឡើង សម្រាប់បម្រើក្នុងវិស័យព្រះពុទ្ធសាសនា សម្រាប់បងប្អូនមកធ្វើបុណ្យទានថែមទៀតផង៕
អត្ថបទ និងរូបភាព៖ លោក អ៊ុន ណារាជ្យ
