នៅថ្ងៃទី២១ ខែមេសា ឆ្នាំ២០២៥នេះ ព្រះធម្មសិរី ជុំ គឹមឡេង ព្រះសុមង្គលសិលាចារ្យ ព្រះមេគណខេត្តសៀមរាប រួមនឹងព្រះមន្ត្រីសង្ឃ និងពុទ្ធបរិស័ទខេត្តសៀមរាប បាននិមន្តចុះសួរសុខទុក្ខ និងនាំយកគ្រឿងឧបភោគបរិភោគជាអំណោយរបស់ សម្ដេចព្រះព្រហ្មរតនមុនី ពិន សែម សិរីសុវណ្ណោ ទៅចែកជូនដល់បងប្អូនកងទ័ពនៅប្រាសាទតាមាន់ និងប្រាសាទតាក្របី ដែលកំពុងឈរជើងការពារខ្សែបន្ទាត់ព្រំដែនខេត្តឧត្ដរមានជ័យ។
ក្នុងឱកាសនោះ ព្រះធម្មសិរី ជុំ គឹមឡេង បានថ្លែងការកោតសរសើរ ដល់បងប្អូនកងទ័ពទាំងអស់ ដែលបានលះបង់កម្លាំងកាយចិត្ត ការពារជាតិ អធិបតេយ្យភាព បូរណភាពទឹកដី ដើម្បីសុខសន្តិភាពស្ថិរភាព។ ចំពោះការចុះសួរសុខទុក្ខនាពេលនេះដែរ គឺដើម្បីជាការផ្សារភ្ជាប់មនោសញ្ចេតនារំលែកការលំបាករវាងព្រះសង្ឃ និងកងទ័ព ក្នុងន័យជួយលើកទឹកចិត្ត និងបានដឹងពីសុខទុក្ខបងប្អូនកងទ័ព ដែលកំពុងបំពេញភារកិច្ចក្នុងបុព្វហេតុការពារមាតុប្រទេសកម្ពុជាឡើយ។
ព័ត៌មានជាតិ ថ្មីៗ
ឧត្តមសេនីយ៍ត្រី ឈឹម យ៉ើត មេបញ្ជាការរងកងពលតូចលេខ៤២ ខេត្តឧត្ដរមានជ័យ បានឱ្យដឹងថា បច្ចុប្បន្នសភាពការណ៍នៅតាមបណ្ដោយព្រំដែនក្នុងភូមិសាស្ត្រអង្គភាពនេះឈរជើង គឺមានសភាពស្ងប់ស្ងាត់ពុំមានអ្វីប្រែប្រួលឡើយ។ តែយ៉ាងណាដោយក៏កងទ័ពនៅតែប្រុងស្មារតី និងប្រុងប្រយ័ត្នខ្ពស់ ពុំធ្វេសប្រហែសឡើយ។ ក្នុងនោះក្រៅពីការងារស្នូល ការពារ រក្សាសន្តិសុខសណ្ដាប់ធ្នាប់ខ្សែក្រវ៉ាត់ព្រំដែន អង្គភាពក៏បានយកចិត្តទុកដាក់ឱ្យយោធិនចូលរួមការងារកសាងអង្គភាពផងដែរ។
សូមជំរាបថា អំណោយដែលបាននាំយកមកប្រគល់ជូនរួមមាន អង្គរ១តោន មីជាតិ១២៩កេស រួមនឹងភេសជ្ជៈ ត្រីខ ប្រហុក ទឹកសុីអុីវ ទឹកត្រី អំបិល និងថវិកាចំនួន ១៥ ១៤៥ ០០០រៀល៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
