នៅព្រឹកថ្ងៃទី១១ ខែមេសា ឆ្នាំ២០២៥នេះ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប និង ឯកឧត្តម ប្រាក់ សោភ័ណ អភិបាលខេត្ត បានដឹកនាំឯកឧត្តម លោកជំទាវ សមាជិកក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរអង្គភាព និងមន្រ្តីរាជការក្នុងខេត្ត រៀបចំពិធីសូត្រមន្ត ប្រោះព្រំសុំសេចក្ដីសុខ រាប់បាត្រព្រះសង្ឃ និងសំណេះសំណាលជាមួយមន្ត្រីរាជការ ក្នុងឱកាសបុណ្យចូលឆ្នាំថ្មីប្រពៃណីជាតិ
ក្នុងឱកាសនោះ ឯកឧត្តម ប្រាក់ សោភ័ណ អភិបាលខេត្ត បានថ្លែងកោតសសើរ និងអរគុណ ចំពោះកិច្ចខិតខំប្រឹងប្រែងរបស់គណៈអភិបាលខេត្ត រដ្ឋបាលក្រុងស្រុក កងកម្លាំងប្រដាប់អាវុធ អាជ្ញារធរគ្រប់មូលដ្ឋានគ្រប់លំដាប់ថ្នាក់ ដែលបានខិតខំជួយថែរក្សាសន្តិសុខ សណ្ដាប់ធ្នាប់ របៀបរៀបរយសាធារណៈក្នុងសង្គម ដោយបានបំពេញការងារដ៏នឿយហត់រយៈពេល១ឆ្នាំមកនេះ។
ឯកឧត្តម ក៏បានណែនាំ និងជំរុញដល់មន្ត្រីរាជការនៃរដ្ឋបាលខេត្ត ត្រូវបន្តបំពេញនូវភារកិច្ចស្នូលរបស់ខ្លួន រក្សាសាមគ្គីភាពផ្ទៃក្នុងឱ្យបានល្អ ព្រមទាំងបម្រើនូវសេវាជូនប្រជាជនឱ្យបានទាន់ពេលវេលា និងធ្វើការគ្រប់គ្រងដោយសមធម៌ ចំពោះមន្ត្រីក្រោមឱវាទនៃទីចាត់ការទាំង៦ និងមានការទំនាក់ទំនងល្អជាមួយបណ្ដាមន្ទីរអង្គភាព និងភ្ញៀវជាតិអន្តរជាតិ យកចិត្តទុកដាក់ក្នុងការធ្វើអនាម័យ ថែទាំសុខ និងចេះជួយទុក្ខធុរៈគ្នាទៅវិញទៅមកក្នុងគ្រាលំបាកផ្សេងៗ។
ព័ត៌មានជាតិ ថ្មីៗ
សូមជម្រាបថា ក្នុងឱកាសចូលឆ្នាំថ្មីនេះដែរ ថ្នាក់ដឹកនាំ និងមន្ត្រីរាជការនៃបណ្ដាមន្ទីរអង្គភាពជុំវិញខេត្ត រួមនឹងវិស័យឯកជន ក៏បានចូលរួមសម្ដែងការគួរសម និងជូនពរជ័យ ក្នុងឱកាសបុណ្យចូលឆ្នាំថ្មីប្រពៃណីជាតិ ជូនដល់ ឯកឧត្តមប្រធានក្រុមប្រឹក្សាខេត្ត ឯកឧត្តមអភិបាលខេត្ត សូមប្រកបដោយសុខភាពល្អបរិបូរណ៍ ជន្មាយុយឺនយូរ កម្លាំងកាយមាំមួន ប្រាជ្ញាឈ្លាសវៃ ទទួលបានជោគជ័យដ៏ត្រចះត្រចង់ថ្មីៗទៀត លើការអភិវឌ្ឍក្នុងខេត្តសៀមរាប ឱ្យកាន់តែរីកចម្រើនឡើងបន្ថែមទៀត៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
