ប្រធានក្រុមការងារទំនាក់ទំនងសាធារណៈ នៃព្រឹត្តិការណ៍អង្គរសង្ក្រាន្ត ឆ្នាំ២០២៥ ឯកឧត្តម សោម រតនា នៅរសៀលថ្ងៃទី១០ ខែមេសា ឆ្នាំ២០២៥នេះ បានឱ្យដឹងថា រហូតមកដល់ពេលនេះការងារធំៗ នៅក្នុងព្រឹត្តិការណ៍អង្គរសង្ក្រាន្ត ត្រូវបានក្រុមការងាររៀបចំរួចរាល់សព្វគ្រប់ហើយសម្រាប់ទទួលភ្ញៀវទេសចរ គ្រប់ជាតិសាសន៍ ដោយនៅសល់តែការងារតូចៗខ្លះ ដែលនឹងធ្វើឱ្យហើយមុនថ្ងៃព្រឹត្តិការណ៍។
ឯកឧត្តម សោម រតនា ក៏បានអំពាវនាវសូមឱ្យភ្ញៀវទេសចរជាតិ អន្តរជាតិ និងប្រជាពលរដ្ឋខ្មែរ មកកម្សាន្តនៅក្នុងព្រឹត្តិការណ៍អង្គរសង្ក្រាន្ត នៅខេត្តសៀមរាប ឱ្យបានច្រើន ព្រោះអង្គរសង្ក្រាន្តឆ្នាំនេះ ការរៀបចំមានភាពទាក់ទាញកាន់តែខ្លាំងទាំងវិសាលភាពនៃការរៀបចំកម្មវិធី ទាំងភាពទាក់ទាញនៃកម្មវិធីនីមួយៗ ដែលមានការរៀបចំឡើងដោយមានការយកចិត្តទុកដាក់។ ដូច្នេះសូមបងប្អូនមកចូលរួមកម្សាន្តឱ្យបានច្រើន ដើម្បីជាការលើកទឹកចិត្តដល់ក្រុមយុវជនស្ម័គ្រចិត្តរបស់យើង ដែលបានចូលរួមរៀបចំនៅក្នុងព្រឹត្តិការណ៍នេះ ក៏ដូចជាការគាំទ្រដល់សិល្បៈវប្បធម៌ ប្រពៃណីខ្មែរយើង ក៏ដូចជាការជួបជុំសប្បាយរីករាយជាមហាគ្រួសារខ្មែរ។
ឯកឧត្តម បានឱ្យដឹងទៀតថា សង្ក្រាន្តឆ្នាំនេះ នៅតែរក្សាបានគោលបំណងរបស់ខ្លួន គឺការផ្សព្វផ្សាយអំពីទេសចរណ៍ និងសិល្បៈវប្បធម៌ ក្នុងនោះអង្គរសង្ក្រាន្តបានលើកយកនូវកម្មវិធីកម្សាន្តធំៗចំនួន៣៨កម្មវិធី ដោយក្នុងកម្មវិធីនីមួយៗ មានការសម្ដែងសិល្បៈ ល្បែងប្រជាប្រិយ របស់ខ្មែរជាច្រើនទម្រង់ផ្សេងៗគ្នា។ ដូច្នេះការចូលរួមផ្សព្វផ្សាយអំពីអង្គរសង្ក្រាន្ត ជាការចូលរួមយ៉ាងសំខាន់ក្នុងការជួយដល់សេដ្ឋកិច្ចរបស់អ្នកខេត្តសៀមរាបតាមរយៈការបង្ហាញនូវគោលដៅទេសចរណ៍ សំខាន់ៗរបស់ខេត្តសៀមរាបទៅកាន់ពិភពលោក។
ព័ត៌មានជាតិ ថ្មីៗ
សូមបញ្ជាក់ថា ព្រឹត្តិការណ៍អង្គរសង្ក្រាន្ត ឆ្នាំ២០២៥នេះ ក្រោមប្រធានបទ «ញញឹមសាទរសង្ក្រាន្តឆ្នាំថ្មី» ដែលនឹងលើកយកនូវកេរដំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមករំលេចឡើងជាផ្ទាំងទស្សនីយភាពចម្រុះដ៏សម្បូរបែបនៅលើទឹកដីអង្គររយៈពេល ០៣ថ្ងៃ គឺចាប់ពីថ្ងៃទី ១៤ ដល់១៦ ខែមេសា ឆ្នាំ២០២៥ នៅ៣ទីតាំងធំៗ រួមមាន នៅបរិវេណប្រាសាទអង្គរវត្ត, តំបន់មាត់ស្ទឹងសៀមរាប និងអង្គរឃ្យុងយូ៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
