នៅថ្ងៃទី០៨ ខែមេសា ឆ្នាំ២០២៥នេះ សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តសៀមរាប ដឹកនាំដោយ លោកជំទាវ ស៊ិន ណម ប្រធាន សាខាសមាគមនារីកម្ពុជា ដើម្បីសន្តិភាព និង អភិវឌ្ឍន៍ខេត្តសៀមរាប បាននាំយកអំណោយរបស់ សម្ដេចកិត្តិសង្កហបណ្ឌិត ម៉ែន សំអន ប្រគល់ជូនស្រ្តីម្នាក់ មកពីខេត្តកំពង់ធំ ដែលសម្រាលបានកូនភ្លោះ៣នាក់ នៅមន្ទីរពេទ្យជ័យវរ្ម័នទី៧ (គន្ធបុប្ផាសៀមរាប)។
ក្នុងឱកាស លោកជំទាវ ស៊ិន ណម ប្រធាន បាននាំយកការផ្ដាំផ្ញើ សាកសួរសុខទុក្ខ និងការនឹករលឹកពីសំណាក់សម្ដេចកិត្តិសង្គហបណ្ឌិត ម៉ែន សំអន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកិត្តិយសសមាគមនារីកម្ពុជា ជូនក្រុមគ្រួសារប្អូនស្រី ជួន សុម៉ុម មានស្រុកកំណើតនៅខេត្តកំពង់ធំ ដែលសម្រាលភ្លោះប្រុសស្រី ៣នាក់ ដែលបានកំពុងសម្រាកនៅក្នុងមន្ទីរពេទ្យ ក្រោមការយកចិត្តទុកដាក់ខ្ពស់ពីក្រុមគ្រូពេទ្យជំនាញៗ។
លោកជំទាវ ក៏បានណែនាំដល់មាតាបិតាទារកភ្លោះ ៣នាក់ ត្រូវបន្តតាមដានសុខភាពរបស់ទារកឱ្យបានដិតដល់ ប្រសិនបើមានអ្វីកើតឡើង សូមជំរាបជូនដំណឹងទៅកាន់ក្រុមគ្រូពេទ្យប្រចាំការ ជៀសវាងគ្រោះថ្នាក់ជាយថាហេតុដល់ទារក។ លោកជំទាវ ក៏បានថ្លែងអំណរគុណ ជូនចំពោះក្រុមគ្រូពេទ្យទាំងអស់ នៃមន្ទីរពេទ្យជ័យវរ្ម័ន្តទី៧ ដែលតែងតែយកចិត្តទុកដាក់ថែទាំសុខភាព ជូនប្រជាពលរដ្ឋទាំងអស់ ដោយមិនរើសមុខ ពិសេសប្រជាពលរដ្ឋទីទល់ក្រខ្វះខាតមកពីទីជិតឆ្ងាយ។
បើតាម លោកវេជ្ជបណ្ឌិតសាស្ត្រាចារ្យ យ៉ៃ ចន្ទនា នាយកមន្ទីរពេទ្យជ័យវរ្ម័នទី៧ បានឱ្យដឹងថា ក្រៅពីពិនិត្យ និងព្យាបាលកុមារកម្ពុជា ផ្នែកសម្ភពរបស់មន្ទីរពេទ្យ ក៏បានទទួលពិនិត្យផ្ទៃពោះដល់ស្រ្តី ពី៣០០ ទៅ៥០០នាក់ និងសម្រាលកូន ពី៦០-៨០នាក់ក្នុងមួយថ្ងៃ។ ក្នុងចំណោមនោះមាន ស្ត្រី១០-១៥ករណី ជាស្រ្តីដែលមានហានិភ័យ ដូចជាកូនខ្សោយ បញ្ហាលើសសម្ពាធឈាម និងជំងឺបម្រុងក្រឡាភ្លើងជាដើម។
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
