ប្រធានក្រុមការងារថ្នាក់ជាតិចុះមូលដ្ឋានស្រុកវ៉ារិន ខេត្តសៀមរាប ឯកឧត្តម ឃុន សាវឿន បានណែនាំដល់ក្រុមការងារទាំងអស់ ជាពិសេសអាជ្ញាធរមូលដ្ឋាន បន្តយកចិត្តទុកដាក់ក្នុងការបម្រើសេវាសាធារណៈ និងដោះស្រាយបញ្ហាប្រឈមជូនប្រជាពលរដ្ឋឱ្យបានទាន់ពេលវេលា ជំរុញឱ្យមូលដ្ឋានរបស់ខ្លួនមានការអភិវឌ្ឍ និងរីកចម្រើនលើគ្រប់វិស័យ។
ក្នុងឱកាសអញ្ជើញប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានស្រុកវ៉ារិន នៅថ្ងៃទី០៧ ខែមេសា ឆ្នាំ២០២៥នេះ ឯកឧត្តម ឃុន សាវឿន មានប្រសាសន៍ថា ក្រុមការងាររាជរដ្ឋាភិបាលមានតួនាទី តម្រង់ទិស គាំទ្រ និងជំរុញការលើកកម្ពស់សមត្ថភាពស្ថាប័ននៅមូលដ្ឋាន ដើម្បីពង្រឹងការទទួលខុសត្រូវ និងភាពជាម្ចាស់របស់មូលដ្ឋាន ក្នុងការអនុវត្តកម្មវិធីនយោបាយយុទ្ធសាស្រ្តបញ្ចកោណដំណាក់កាលទី១ ក្នុងការផ្ដល់សេវាសាធារណៈ និងដោះស្រាយ ឆ្លើយតបសំណើ សំណូមពររបស់ប្រជាពលរដ្ឋក្នុងមូលដ្ឋាន ប្រកបដោយប្រសិទ្ធភាព តម្លាភាព និងគណនេយ្យភាព។
ឯកឧត្តម មានប្រសាសន៍ទៀតថា ផ្អែកតាមរបាយការណ៍របស់រដ្ឋបាលស្រុក ឯកឧត្តមសូមថ្លែងការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែង អនុវត្តការងារយ៉ាងហ្មត់ចត់ និងយកចិត្តទុកដាក់ខ្ពស់ប្រកបដោយប្រសិទ្ធភាពខ្ពស់ពីសំណាក់ក្រុមការងារ និងអាជ្ញាធរគ្រប់ជាន់ថ្នាក់។ ក្នុងនោះក៏សូមឱ្យក្រុមការងារ បន្តភាពខ្លាំងរបស់ដោយ តាមរយៈការបន្តបំពេញតួនាទី ភារកិច្ចរបស់ខ្លួនឱ្យបានកាន់តែល្អបន្ថែមទៀត ជាពិសេសការបម្រើសេវាសាធារណៈ និងដោះស្រាយបញ្ហាប្រឈមជូនប្រជាពលរដ្ឋឱ្យបានទាន់ពេលវេលា ដើម្បីធ្វើឱ្យមូលដ្ឋានមានការអភិវឌ្ឍ និងរីកចម្រើន។
ព័ត៌មានជាតិ ថ្មីៗ
លោក ធិននី វិធូរ អភិបាលស្រុកវ៉ារិន បង្ហាញថា អាជ្ញាធរស្រុក និងកងកម្លាំងមានសមត្ថកិច្ចគ្រប់លំដាប់ថ្នាក់ តែងតែយកចិត្តទុកដាក់ និងមានកិច្ចសហការយ៉ាងជិតស្និទ្ធជាមួយប្រជាពលរដ្ឋនៅក្នុងមូលដ្ឋាន ដែលធានាបាននូវសន្ដិសុខសណ្ដាប់ធ្នាប់សាធារណៈក្នុងស្រុកមានលក្ខណ:ល្អប្រសើរគួរឱ្យកត់សម្គាល់ជូនដល់ប្រជាពលរដ្ឋ។ បច្ចុប្បន្នក្នុងស្រុកវ៉ារិន មានការអភិវឌ្ឍលើគ្រប់វិស័យ ដូចជា ការងារសន្ដិសុខសណ្ដាប់ធ្នាប់សាធារណៈ ការផ្ដល់សេវាសាធារណៈ ការសាងសង់ហេដ្ឋារចនាសម្ព័ន្ធ និងសមិទ្ធផលផ្សេងៗជាច្រើនទៀត៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
