នៅថ្ងៃទី១១ ខែមិថុនា ឆ្នាំ២០២៥នេះ អគារបណ្ណាល័យមួយខ្នង នៃសាលាបឋមសិក្សាលៀបចាស់ ស្ថិតក្នុងឃុំពាក់ស្នែង ស្រុកអង្គរធំ ខេត្តសៀមរាប ជាអំណោយរបស់ អង្គការឡូធើសវើល (LOTUS WORLDS) ត្រូវបានសម្ពោធដាក់ឱ្យសិស្សានុសិស្សប្រើប្រាស់ជាផ្លូវការ ដែលជាផ្នែកមួយសម្រាប់បម្រើដល់វិស័យអប់រំនៅតាមតំបន់ជនបទ។
ព្រះតេជគុណ សង់ក្វាន់ ប្រធានអង្គការឡូធើសវើល បានសម្ដែងនូវការអរគុណដល់ ព្រះតេជគុណ ឈីនសង់ ព្រះចៅអធិការវត្តយ៉ុនហ្វាសារ ដែលខិតខំប្រឹងប្រែងជួយឱ្យសាលាបឋមសិក្សាលៀបចាស់ ទទួលបាននូវសមិទ្ធផលជាច្រើន ជំរុញបំពេញតម្រូវការរបស់សិស្សានុសិស្សក្នុងតំបន់មួយនេះរីកចម្រើនជាបន្តបន្ទាប់។ ព្រះតេជគុណ ក៏បានលើកទឹកចិត្តសិស្សានុសិស្ស ត្រូវខិតខំសិក្សារៀនសូត្រ កុំបោះបង់ការសិក្សា ព្រោះមានតែការសិក្សាទេ ដែលអាចនាំឱ្យប្អូនៗមានអនាគតល្អនាថ្ងៃអនាគត។
ព័ត៌មានជាតិ ថ្មីៗ
លោក អេង សំបាន់ អភិបាលរងស្រុកអង្គរធំ បានថ្លែងអំណរគុណដល់សប្បុរសជន ចំពោះការចូលរួមចំណែកអភិវឌ្ឍវិស័យអប់រំក្នុងតំបន់លៀបចាស់ ដែលវាបានឆ្លុះបញ្ចាំងឱ្យឃើញពីការចូលរួមក្នុងការអនុវត្តយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា នីតិកាលទី៧។ លោកក៏បានលើកទឹកចិត្តដល់អាណាព្យាបាលទាំងអស់ ជំរុញឱ្យកូនមកសិក្សាឱ្យបានគ្រប់គ្នា ព្រោះពួកគាត់នេះហើយ ជាធនធានដ៏មានតម្លៃសម្រាប់ប្រទេសជាតិទៅថ្ងៃអនាគត។
គួរឱ្យដឹងថា តាំងពីឆ្នាំ២០២២មក អង្គការឡូធើសវើល បានជួយឧបត្ថម្ភយ៉ាងច្រើនដល់សាលាបឋមសិក្សាលៀបចាស់ រួមមាន អគារសិក្សា បណ្ណាល័យ សួនកម្សាន្ត សម្ភារសិក្សាជាច្រើនទៀត៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
