គោលនយោបាយ ភូមិ ឃុំ មានសុវត្ថិភាព គឺជាកត្តាដ៏សំខាន់ សម្រាប់បម្រើការពារសន្តិសុខសណ្ដាប់ធ្នាប់សាធារណៈ ជូនប្រជាពលរដ្ឋនៅតាមមូលដ្ឋាន ប្រកបដោយភាពកក់ក្តៅ និងសុវត្ថិភាពខ្ពស់។ ក្នុងនោះអាជ្ញាធរមានសមត្ថកិច្ចនៅក្នុងក្រុងរុនតាឯកតេជោសែនខេត្តសៀមរាបបានអនុវត្តដូចភ្លៀងរលឹមនូវគោលនយោបាយទាំងនោះ ដើម្បីធានាឱ្យបាននូវ សន្តិសុខ សុវត្ថិភាព និងសណ្តាប់ធ្នាប់សាធារណៈក្នុងមូលដ្ឋានខ្លួន។
លោកវរសេនីយ៍ទោ អ៊ុច សុខេន អធិការនៃអធិការដ្ឋាននគរបាលក្រុងរុនតាឯកតេជោសែន បានឱ្យដឹងថា៖ អនុវត្តតាមការណែនាំរបស់ថ្នាក់ដឹកនាំនៃស្នងការដ្ឋាននគរបាលខេត្តសៀមរាប ចាប់តាំងពីការបង្កើតឱ្យមានអធិការដ្ឋាននគរបាលក្រុងរុនតាឯកតេជោសែនមក បានអនុវត្ត និងចុះផ្សព្វផ្សាយនូវគោលនយោបាយភូមិឃុំសង្កាត់ មានសុវត្ថិភាពដូចភ្លៀងរលឹម។ លោកបានបន្តថា យ៉ាងហោចណាស់ក្នុងមួយខែ បានចុះអប់រំផ្សព្វផ្សាយ ក្នុងវេទិការសាធារណៈនានា មិនតិចជាង១០លើកឡើយ ទៅកាន់បងប្អូនប្រជាពលរដ្ឋ និងសិស្សានុសិស្សក្នុងមូលដ្ឋាន ដើម្បីបានជ្រាបពីគោលការណ៍៧ចំណុចនៃភូមិឃុំមានសុវត្ថិភាពរបស់រាជរដ្ឋាភិបាល។ ទាំងនេះ ដើម្បីធានាឱ្យនូវភូមិឃុំ សង្កាត់មានសុវត្ថិភាព ប្រជាពលរដ្ឋអាចរស់នៅដោយសុខសាន្ត មិនមានភ័យក្លាយអំពីភាពអសកម្មណាមួយឡើយ។
លោកអធិការក្រុងបន្ថែមទៀតថា៖ មកដល់បច្ចុប្បន្ននេះ ប្រជាពលរដ្ឋបានយល់ដឹង និងចូលរួមយ៉ាងសកម្មជាមួយអាជ្ញាធរពាក់ព័ន្ធ ក្នុងការអនុវត្តគោលនយោបាយភូមិឃុំមានសុវត្ថិភាព ជាពិសេសច្បាប់ចរាចរណ៍ផ្លូវគោក បញ្ហាគ្រឿង និងល្បែងស៊ីសងខុសច្បាប់ ធ្វើឱ្យមូលដ្ឋានស្ទើរតែលុបបំបាត់ទាំងស្រុងនូវភាពបទល្មើសទាំងនេះ។
ជាមួយគ្នានេះ លោកអធិការនៃអធិការដ្ឋាននគរបាលក្រុងរុនតាឯកតេជោសែន បានលើកទឹកចិត្ត បងប្អូនប្រជាពលរដ្ឋទាំងអស់ សូមបន្តចូលរួម និងរាយការណ៍នូវរាល់បទល្មើសក្នុងមូលដ្ឋាន ដើម្បីទប់ស្កាត់និងបង្រ្កាបបានទាន់ពេលវេលា ហើយការផ្តល់ព័ត៌មានគឺរក្សាការសំងាត់ មិនបើកចំហរទេ រាល់ការផ្តល់ព័ត៌មានគឺ២៤ម៉ោងលើ២៤ម៉ោងយើងនឹងចុះអន្តរាគមន៍ភ្លាមៗ។
សូមជម្រាបថា លក្ខណៈសម្បត្តិរបស់ភូមិ-ឃុំ-សង្កាត់មានសុវត្ថិភាព រួមមាន៖ ១. ផ្តល់សេវាសាធារណៈ ជាពិសេសសេវារដ្ឋបាលប្រកបដោយគុណភាព តម្លាភាព និងទទួលបានជំនឿទុកចិត្ត។ ២.គ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ។ ៣. មានសណ្តាប់ធ្នាប់សាធារណៈល្អ ជាពិសេសគ្មានគ្រោះថ្នាក់ចរាចរណ៍។ ៤.គ្មានអំពើអនាចារ គ្មានការជួញដូរមនុស្ស ជាពិសេសស្រ្តីនិងកុមារ គ្មានអំពើហិង្សាក្នុងគ្រួសារ និងគ្មានក្មេងទំនើង។ ៥.ដោះស្រាយវិវាទនៅមូលដ្ឋានក្រៅប្រព័ន្ធតុលាការប្រកបដោយគុណភាព និងប្រសិទ្ធភាព។ ៦.មានអនាម័យ មានសោភ័ណភាពល្អ និងមានបរិស្ថានល្អ។និង៧. ឆ្លើយតបបានទាន់ពេលវេលាចំពោះគ្រោះមហន្តរាយនិងរាល់ជំងឺឆ្លងរាតត្បាតកាចសាហាវប្រកបដោយប្រសិទ្ធភាព៕
អត្ថបទ និងរូបភាព ៖ លោក យូ វង្ស
