ថ្លែងក្នុងកិច្ចប្រជុំគណៈកម្មការចម្រុះលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរប្រចាំឆមាសទី១ ឆ្នាំ២០២៥ នៅថ្ងៃទី១៣ ខែមិថុនា ឆ្នាំ២០២៥នេះ លោកស្រី ម៉មនី រង្សី អភិបាលរងខេត្តសៀមរាប បានជំរុញឱ្យគ្រប់អ្នកពាក់ព័ន្ធទាំងអស់ ចូលរួមក្នុងការលើកកម្ពស់សីលធម៌សង្គម តម្លៃស្ដ្រី និងគ្រួសារខ្មែរ និងបន្តលុបបំបាត់ឱ្យបាននូវភាពអសកម្មទាំងឡាយក្នុងសង្គម តាមរយៈការចូលរួមដោះស្រាយទាំងស្ថាប័ននីតិបញ្ញត្តិ នីតិប្រតិបត្តិ តុលាការ ដៃគូអភិវឌ្ឍន៍ សង្គមស៊ីវិល ផ្នែកឯកជន និងប្រជាជនគ្រប់រូប។
លោកស្រី ម៉ននី រង្សី មានប្រសាសន៍ថា ស្របពេលដែលក្នុងសង្គមបច្ចុប្បន្នប្រព័ន្ធបច្ចេកវិទ្យាឌីជីថលពុងរីកចម្រើនខ្លាំង ដែលធ្វើឱ្យមនុស្សមួយចំនួនផ្សព្វផ្សាយតាមបណ្ដាញសង្គមនូវរូបភាពរបស់ខ្លួន ដូចជារូបភាពអាសអាភាស ការស្លៀកពាក់មិនសមរម្យ សំដីមិនសមរម្យ ដែលធ្វើឱ្យប៉ះពាល់ដល់សីលធម៌សង្គម តម្លៃស្រ្ដី។ ដូច្នេះ យើងត្រូវរួមគ្នាលើកកម្ពស់វប្បធម៌របស់យើងឱ្យបានខ្ពង់ខ្ពស់ដល់កូនចៅជំនាន់ក្រោយ ខណៈដែលកម្ពុជាប្រកាន់ជាប់នូវវប្បធម៌ប្រពៃណីផូរផង់តាំងពីអតីតកាល។ ពិតណាស់ វប្បធម៌រលត់ជាតិរលាយ វប្បធម៌ពន្រាយ ជាតិថ្កើងថ្កាន។
ព័ត៌មានជាតិ ថ្មីៗ
លោកស្រីអភិបាលរងខេត្ត ក៏បានណែនាំដល់អាជ្ញាធរគ្រប់ជាន់ថ្នាក់ ត្រូវបន្តយកចិត្តទុកដាក់ហើយកាន់តែខ្លាំងក្លាថែមទៀត ជំរុញការអប់រំផ្សព្វផ្សាយឲ្យទូលំទូលាយអំពីសីលធម៌ សុជីវធម៌ក្នុងការរស់នៅ និងច្បាប់ពាក់ព័ន្ធទាំងឡាយជូនដល់បងប្អូនប្រជាពលរដ្ឋគ្រប់ទិសទីទាំងអស់ទាំងនៅក្នុងគ្រួសារ នៅកន្លែងធ្វើការ ក៏ដូចជានៅសហគមន៍។ បណ្ដាញប្រព័ន្ធផ្សព្វផ្សាយទាំងរដ្ឋ និងឯកជនត្រូវបង្កើនកម្មវិធីអប់រំល្អៗឲ្យបានកាន់តែច្រើនថែមទៀត ក្នុងន័យអប់រំសីលធម៌សុជីវធម៌ រួមទាំងការស្លៀកពាក់ការប្រើប្រាស់ពាក្យសម្ដីកាយវិការនិងខ្លឹមសារសម្ដែងឲ្យមានភាពសមរម្យ និងថ្លៃថ្នូរដើម្បីឆ្លុះបញ្ចាំងពីអត្តសញ្ញាណជាតិមួយដែលមានអរិយធម៌ខ្ពស់៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
