ថ្លែងក្នុងពិធីផ្សព្វផ្សាយច្បាប់ស្តីពីសំណង់ នៅសាលាស្រុកប្រាសាទបាគង នៅថ្ងៃទី១៣ ខែមិថុនានេះ លោក លឹម ភក្ដី ប្រធានមន្ទីរអធិការកិច្ចខេត្តសៀមរាប បានបង្ហាញថា ច្បាប់ស្ដីពីសំណង់ មាន២២ជំពូក និង១១១មាត្រា ដែលជាច្បាប់ធានាដល់គុណភាពសន្តិសុខ សុវត្ថិភាពសំណង់ ការពារទ្រព្យសម្បតិ្ត និងសុខុមាលភាពរបស់ម្ចាស់សំណង់ អ្នកប្រើប្រាស់ បង្កើនការជឿទុកចិត្តរបស់វិនិយោគិនក្នុងវិស័យសំណង់ និងជំរុញទីផ្សារអចលនទ្រព្យប្រកបដោយប្រសិទ្ធភាព រួមចំណែកការពារសណ្ដាប់ធ្នាប់សាធារណៈ ធ្វើឱ្យជីវភាពរស់នៅរបស់ប្រជាពលរដ្ឋក្នុងសហគមន៍បានល្អប្រសើរ។
លោក លឹម ភក្តី មានប្រសាសន៍ថា សម្រាប់គោលបំណងរៀបចំពិធីផ្សព្វផ្សាយនេះ គឺចង់ឱ្យអាជ្ញាធរ មន្ត្រីជំនាញយល់ដឹងអំពីគោលការណ៍វិធានសំខាន់ៗ ដើម្បីធានាអនុវត្តឱ្យបានត្រឹមត្រូវ មានការឯកភាពគ្នា បំពេញតួនាទី សមត្ថកិច្ចរបស់ខ្លួនប្រកបទៅដោយការទទួលខុសត្រូវ។ បង្កើនប្រសិទ្ធភាពក្នុងគ្រប់គ្រងវិស័យសំណង់ ជាពិសេសច្បាប់ស្ដីពីសំណង់មានគោលបំណងធានាគុណភាពសន្តិសុខ សុវត្ថិភាពសំណង់ ការការពារទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់ និងសាធារណៈជន។
លោក សូរ ប្លាតុង អភិបាលស្រុកប្រាសាទបាគង មានប្រសាសន៍ថា ច្បាប់នេះមានសារៈសំខាន់និងជួយបង្កើននូវការយល់ដឹងដល់អាជ្ញាធរគ្រប់លំដាប់ថ្នាក់ និងបញ្ជ្រាបការយល់ដឹងជូនដល់ប្រជាពលរដ្ឋ សំដៅលើកកម្ពស់ប្រសិទ្ធភាពនៃការផ្ដល់សេវាសាធារណៈ ឱ្យកាន់តែល្អប្រសើរឡើងពាក់ព័ន្ធនឹងវិស័យសំណង់ និងការសាងសង់គ្រប់ប្រភេទរបស់ប្រជាពលរដ្ឋត្រូវអនុលោមតាមច្បាប់ស្ដីពីសំណង់ និងលិខិតបទដ្ឋានគតិយុត្តនានាដែលមានជាធរមាន។
លោកបានអំពាវនាវដល់ប្រជាពលរដ្ឋ ក៏ដូចជាអាជ្ញាធរមូលដ្ឋានត្រូវរួមគ្នាអនុវត្តឱ្យមានប្រសិទ្ធភាពនូវលិខិតបទដ្ឋាន ឯកសារគតិយុត្តនិងច្បាប់ស្ដីពីសំណង់ ព្រោះច្បាប់នេះ ជួយការពារនូវសុវត្ថិភាពសំណង់ ការការពារទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់ និងសាធារណៈជន។ សម្រាប់បងប្អូនដែលមានបំណងចង់ជួសជុល កែលម្អ ឬសាងសង់សំណង់ផ្សេងៗ ត្រូវអនុវត្តតាមច្បាប់នេះ ហើយប្រការសំខាន់បំផុតមុននឹងសាងសង់អ្វីមួយ ដីរបស់បងប្អូនត្រូវតែជាដីស្របច្បាប់មានបណ្ណសម្គាល់ម្ចាស់អចលនទ្រព្យ ទើបមានលក្ខណៈត្រឹមត្រូវនិងស្របច្បាប់៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
