នៅថ្ងៃទី១២ ខែមិថុនា ឆ្នាំ២០២៥ រដ្ឋបាលខេត្តសៀមរាប បានរៀបចំបើកវគ្គតម្រង់ទិស ស្តីពីការបំពេញបញ្ជីសំណួរពាក់ព័ន្ធនឹងព័ត៌មានរបស់មន្ត្រីភូមិ តាមប្រព័ន្ធអនឡាញ (Kobo Toolbox) ជូនដល់អាជ្ញាធរ និងមន្ត្រីជំនាញពាក់ព័ន្ធ ដើម្បីឱ្យស្របទៅនឹងសេចក្តីណែនាំរបស់ក្រសួងមហាផ្ទៃ ស្តីពីបែបបទ នីតិវិធី នៃការជ្រើសរើសមេភូមិ ការចូលកាន់តំណែង ការផ្លាស់ប្តូរមេភូមិ ការតែងតាំងជំនួយការមេភូមិ និងតួនាទីភារកិច្ច របៀបរបបធ្វើការងាររបស់ភូមិ។
លោក សុខ ថុល អភិបាលរងខេត្ត បានឱ្យដឹងថា នាពេលឆាប់ៗខាងមុខ នាយកដ្ឋានកិច្ចការរដ្ឋបាលក្រុងស្រុក ឃុំសង្កាត់នៃអគ្គនាយកដ្ឋានរដ្ឋបាលនៃក្រសួងមហាផ្ទៃ គ្រោងប្រមូលទិន្នន័យពីមន្ត្រីភូមិនៅគ្រប់ឃុំសង្កាត់ទូទាំងប្រទេស ដើម្បីធ្វើការវិភាគពីស្ថានភាពនៃមន្ត្រីភូមិ និងកំណត់ពីតួនាទីភារកិច្ចរបស់មន្ត្រីភូមិ ក្នុងការចូលរួមអនុវត្តនូវមុខងារកាតព្វកិច្ច មុខងារប្រតិភូកម្ម និងមុខងារជាជម្រើសដែលបានកំណត់ ប្រគល់ និងផ្ទេរដោយក្រសួងស្ថាប័នដល់រដ្ឋបាលឃុំសង្កាត់។ ដូច្នេះនាយកដ្ឋានបានរៀបចំកម្រងសំណួរ និងរៀបចំនូវឯកសារជំនួយស្មារតី ដើម្បីផ្តល់ជាមូលដ្ឋានដល់គ្រប់ស្មៀនឃុំសង្កាត់ ក្នុងការបំពេញកម្រងសំណួរតាមអនឡាញឱ្យបានត្រឹមត្រូវ។
ព័ត៌មានជាតិ ថ្មីៗ
លោកអភិបាលរងខេត្ត ក៏បានណែនាំដល់សិក្ខាកាមទាំងអស់ ត្រូវផ្សព្វផ្សាយកម្រងសំណួរអនឡាញដែលបានរៀបចំនេះ ទៅដល់គ្រប់រដ្ឋបាល ឃុំសង្កាត់ ជាពិសេសស្មៀន ដោយមានការគាំទ្រពីការិយាល័យផែនការ និងគាំទ្រឃុំសង្កាត់ នៃរដ្ឋបាលក្រុងស្រុក និងការិយាល័យផែនការ និងហិរញ្ញវត្ថុនៃរដ្ឋបាល តាមកាលវិភាគដែលបានកំណត់៕
អត្ថបទ និងរូបភាព៖ រដ្ឋបាលខេត្ត
