គណៈកម្មាធិការសម្របសម្រួលអន្តរជាតិសម្រាប់កិច្ចការពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ICC Angkor) និងសំបូរព្រៃគុក បានបើកជាផ្លូវការ នូវកិច្ចប្រជុំបច្ចេកទេសលើកទី៤០ ស្ដីពីកិច្ចការពារនិងអភិរក្សបេតិកភណ្ឌ ដែលកិច្ចប្រជុំដំណើរការទៅរយៈពេល២ថ្ងៃ ចាប់ពីថ្ងៃទី១៩-២០ ខែមិថុនា ឆ្នាំ២០២៥នេះ នៅលើទឹកដីប្រវត្តិសាស្ត្រអង្គរ នៃខេត្តសៀមរាប។
កិច្ចប្រជុំបច្ចេកទេសនេះដែរ ប្រព្រឹត្តិទៅក្រោមការសម្របសម្រួលពីសហប្រធាន លោក Kensuke Nagase ជារដ្ឋមន្ត្រី និងជាអនុប្រធានបេសកកម្មនៃស្ថានទូតជប៉ុនប្រចាំកម្ពុជា និង លោក Pierre Vincent ជាទីប្រឹក្សាផ្នែកវប្បធម៌របស់ស្ថានទូតបារាំង ក្រោមអធិបតីភាព របស់លោកជំទាវបណ្ឌិត សភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈកម្ពុជា និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា។ កិច្ចប្រជុំ ក៏នឹងពិភាក្សាលើកិច្ចការពារ សង្គ្រោះ និងអភិរក្សប្រាសាទបុរាណជាច្រើននៅក្នុងរមណីយដ្ឋានអង្គរខេត្តសៀមរាប និងសំបូរព្រៃគុកនៅខេត្តកំពង់ធំ ដោយក្រុមអ្នកជំនាញជាតិ និងអន្តរជាតិ។
បើតាមសហប្រធានជប៉ុន លោក Kensuke Nagase បានបង្ហាញថា រាជរដ្ឋាភិបាលជប៉ុន នឹងបន្តជួយដល់គម្រោងជួសជុលប្រាសាទបាយ័ន ជាទឹកប្រាក់ប្រមាណ៩០ម៉ឺនដុល្លារ សម្រាប់រយៈពេល៣ឆ្នាំទៅមុខទៀត ដែលចាប់ផ្ដើមពីខែកញ្ញា ឆ្នាំ២០២៥នេះទៅ។ ជំនួយរបស់រាជរដ្ឋាភិបាលជប៉ុននេះ មិនត្រឹមតែជាការជួយដល់ដំណើរការជួសជុលប្រាសាទបាយ័នប៉ុណ្ណោះទេ វាក៏ជាការជួយលើកតម្លៃនៃរមណីយដ្ឋានអង្គរ ការជួសជុលប្រព័ន្ធលូបង្ហូរទឹកបុរាណនៅបាយ័ន និងការងារនៃការចុះបញ្ជីថ្មីប្រាសាទបុរាណនៅជុំវិញតំបន់នោះផងដែរ៕
ព័ត៌មានជាតិ ថ្មីៗ
អត្តបទ និងរូបភាព៖ មន្ត្រីមន្ទីរ
