ថ្លែងក្នុងព្រឹត្តិការណ៍ទិវាយោគៈអន្តរជាតិ លើកទី១១ លើកទឹកដីនៃខេត្តសៀមរាប នាព្រឹកថ្ងៃទី១៩ ខែមិថុនា ឆ្នាំ២០២៥នេះ លោកស្រី ម៉ននី រង្សី អភិបាលរងខេត្តសៀមរាប បានបង្ហាញថា ព្រឹត្តិការណ៍នេះ ជាចលករមួយដ៏សំខាន់ ក្នុងជួយជំរុញដល់វិស័យទេសចរណ៍ និងកំណើនសេដ្ឋកិច្ចកម្ពុជា ជាពិសេសខេត្តសៀមរាបផ្ទាល់ តាមរយៈការចូលរួមផ្សព្វផ្សាយពីតំបន់អង្គរ ទៅកាន់ពិភពលោក ដើម្បីទាក់ទាញភ្ញៀវទេសចរឱ្យមកទស្សនាខេត្តសៀមរាប ឱ្យកាន់តែច្រើនឡើង។
លោកស្រី ម៉ននី រង្សី បញ្ជាក់ថា ព្រឹត្តិការណ៍នេះ ក៏នឹងបន្តប្រារព្ធធ្វើនៅលើទឹកដីអង្គរដ៏បវរនៃយើងជារៀងរាល់ឆ្នាំ ព្រោះថាខេត្តសៀមរាប គឺជាតំបន់គោលដៅទេសចរណ៍លំដាប់ពិភពលោករបស់ព្រះរាជាណាចក្រកម្ពុជា ដែលវិស័យនេះ គឺជាកត្តាជំរុញដ៏សំខាន់មួយក្នុងចំណោមកត្តាជំរុញកំណើនសេដ្ឋកិច្ចដទៃទៀត។
ព័ត៌មានជាតិ ថ្មីៗ
ឯកឧត្តម គុជ បញ្ញាសា រដ្ឋលេខាធិការក្រសួងទេសចរណ៍ មានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដែលបន្តចាត់ទុកវិស័យទេសចរណ៍ជាវិស័យអាទិភាព ដែលរួមចំណែកដល់ការអភិវឌ្ឍន៍សេដ្ឋកិច្ច និងសង្គម។ ជាក់ស្ដែង តាមរយៈព្រឹត្តិការណ៍នាពេលនេះ នឹងក្កាយជាការលើកកម្ពស់ការយល់ដឹងរបស់ប្រជាជនកម្ពុជាអំពីអត្ថប្រយោជន៍សុខភាពពីការហាត់ Yoga បន្ថែមផងដែរ។ ហើយវាក៏នឹងជំរុញលំហូរភ្ញៀវទេសចរអន្តរជាតិ និងវិនិយោគិនមកកាន់កម្ពុជា ជាពិសេសទេសចរឥណ្ឌា និងអ្នកវិនិយោគមកកម្ពុជា ដើម្បីពង្រឹងកិច្ចសហប្រតិបត្តិការប្រទេសទាំង២ ថែមទៀតផង។
ឯកឧត្តម VANLALVAWNA BAWITLUNG ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា មានប្រសាសន៍ថា ជារៀងរាល់ឆ្នាំទិវាយោគៈ ត្រូវបានប្រារព្ធឡើងក្រោមមូលបទផ្សេងៗគ្នា ហើយសម្រាប់ឆ្នាំ២០២៥ គឺ “យោគៈសម្រាប់ផែនដីតែមួយ សុខភាពតែមួយ” ដែលបានបង្ហាញពីការពិតមួយថា សុខភាពមនុស្សម្នាក់ៗ និងផែនដីមានទំនាក់ទំនងគ្នាទៅវិញទៅមក។ យោគៈ គឺជាលំហាត់ពង្រឹងរាងកាយ ធ្វើឱ្យចិត្តស្ងប់ និងជំរុញការយល់ដឹង និងការទទួលខុសត្រូវខ្ពស់ក្នុងជីវិតប្រចាំថ្ងៃ។ យោគៈមិនមែនគ្រាន់តែជាការធ្វើលំហាត់ប្រាណប៉ុណ្ណោះទេ ប៉ុន្តែជារបៀបនៃជីវិត ជួយយើងឱ្យភ្ជាប់ទំនាក់ទំនងជាមួយខ្លួនយើង ទៅនឹងពិភពលោកជុំវិញយើង៕
អត្តបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
