នារសៀលថ្ងៃទី២២ ខែមិថុនា ឆ្នាំ២០២៥នេះ មន្ត្រីសង្ឃក្នុងខេត្តសៀមរាប បានសហការគ្នារៀបចំធ្វើបុណ្យផ្កាប្រាក់សាមគ្គី ជាកិច្ចជួយទ្រទ្រង់ដល់ពុទ្ធិកវិទ្យាល័យរាជបូណ៌ ក្រុងសៀមរាប ដើម្បីធ្វើការដោះស្រាយបញ្ហាហិរញ្ញវត្ថុ កិច្ចការងាររដ្ឋបាលដែលកំពុងជួបប្រទះ ដូចជា៖ការចំណាយឧបត្ថម្ភលោកគ្រូអ្នកគ្រូ ព្រោះសាលាមិនមានគ្រូក្របខណ្ឌច្រើន ដើម្បីឱ្យកម្មវិធីសិក្សាប្រកបដោយវឌ្ឍនភាព គុណភាពរឹងមាំ។
ព្រះសាសនសត្ថា តង់ តន ព្រះបាឡាត់គណខេត្ត និងជាព្រះគ្រូចៅអធិការវត្តព្រះព្រហ្មរ័ត្ន មានថេរដីកាថា វត្តអារាម បានដើរតួនាទីយ៉ាងសំខាន់ក្នុងការជួយជំរុញបណ្ដុះសីលធម៌ គុណធម៌ អប់រំផ្លូវកាយ ផ្លូវចិត្ត កសាងធនធានមនុស្សឱ្យមានចំណេះដឹង ជាឃ្លាំងសម្រាប់រក្សាទុកចំណេះដឹងដ៏សំបូរបែបដែលផ្ដល់គុណតម្លៃសម្រាប់ការសិក្សាស្រាវជ្រាវមិនចេះរីងស្ងួត។ វត្តអារាម ក៏ជាទីកន្លែងបញ្ជ្រាប និងថែរក្សាអត្តសញ្ញាណជាតិ ហើយក៏ជាកន្លែងស្នាក់នៅ សិក្សារៀនសូត្រចំណេះដឹងទូទៅដល់អ្នកដែលមានការខ្វះខាតផងដែរ។
ព្រះគ្រូ តង់ តន មានថេរដីកាទៀតថា ចំពោះការប្រារព្ធពិធីបុណ្យផ្កាប្រាក់សាមគ្គីនេះដែរ ទទួលបានបច្ច័យប្រមាណជាង ៥០លានរៀល គឺជាចំណែកមួយក្នុងការជួយបំពេញបន្ថែមនូវតម្រូវការរបស់ពុទ្ធិកវិទ្យាល័យរាជបូណ៌ លើការចំណាយប្រចាំថ្ងៃ ព្រោះសាលាផ្ដល់ចំណេះដឹងនេះកំពុងមានតម្រូវការច្រើន លើកម្លាំងពលកម្ម សម្ភារសិក្សា និងការចំណាយផ្សេងៗជាច្រើនទៀត។
ព្រះគ្រូបន្តថា ពិតណាស់ រាជរដ្ឋាភិបាលកម្ពុជាគ្រប់អាណត្តិ បានយកចិត្តទុកដាក់ទាំងវិស័យអាណាចក្រ និងពុទ្ធចក្រ លើកតម្កើងសាលាបាលីនិងពុទ្ធិកសិក្សា ឱ្យមានតុល្យភាពរីកចម្រើនខាងសម្ភារ និងខាងស្មារតី ដើម្បីចូលរួមចំណែកថែរក្សាសន្តិភាព សុខមាលភាពសង្គម និងភាពសុខសាន្តរបស់ប្រជាជន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
