ក្នុងកិច្ចប្រជុំលេខាធិការដ្ឋានគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប (គ.ខ.ប.ជ) ប្រចាំឆមាសទី១ ឆ្នាំ២០២៥ នៅព្រឹកថ្ងៃទី២៤ ខែមិថុនា ឆ្នាំ២០២៥នេះ លោកស្រី ម៉ននី រង្សី អភិបាលរងខេត្ត និងជាប្រធានលេខាធិការដ្ឋាន គ.ខ.ប.ជ បានណែនាំដល់ក្រុមការងារ និងអ្នកពាក់ព័ន្ធ បន្តធ្វើយ៉ាងណាក្ដាប់ឱ្យបានរាល់បញ្ហាប្រឈមនានាពាក់ព័ន្ធនឹងអំពើជួញដូរមនុស្ស ជំរុញការដោះស្រាយឱ្យបានទាន់ពេលវេលា និងមានប្រសិទ្ធភាព។
លោកស្រី ម៉ននី រង្សី បានបង្ហាញថា សម្រាប់រយៈពេលនៃឆមាសទី១ ឆ្នាំ២០២៥នេះ ក្រុមការងារ និងអ្នកពាក់ព័ន្ធ បានធ្វើការដោះស្រាយសម្របសម្រួលផ្ដល់សេវាកម្មផ្នែកច្បាប់ និងសុខាភិបាល លើករណីអំពើហិង្សាទាក់ទងនឹងយេនឌ័រសរុបចំនួន ៥២ករណី ក្នុងនោះករណីអំពើហិង្សាក្នុងគ្រួសារ ៣៤ករណី និងការរំលោភបំពានខាងផ្លូវភេទចំនួន ១៨ករណី។ ដោយឡែកសម្រាប់ខែមិថុនានេះ ក្រុមការងារបានរកឃើញករណីអំពើហិង្សា ៣ករណី និងការរំលោភបំពានខាងផ្លូវភេទ ១ករណីតែប៉ុណ្ណោះ។
លោកស្រីបន្តថា ចំពោះលទ្ធផលដែលក្រុមការងារអនុវត្តបាននេះ លោកស្រីសូមវាយតម្លៃខ្ពស់ចំពោះក្រុមការងារ និងដៃគូពាក់ព័ន្ធដែលបានបំពេញតួនាទីបានល្អ និងបង្ក្រាបនូវអំពើជួញដូរមនុស្សទាន់ពេលវេលា។ ជាមួយនេះ ក៏សូមឱ្យក្រុមការងារ បន្តការចុះអប់រំផ្សព្វផ្សាយដល់ប្រជាពលរដ្ឋអំពីភូមិឃុំមានសុវត្ថិភាព ច្បាប់ លិខិតបទដ្ឋានគតិយុត្ត ឧបាយកលការធ្វើចំណាកស្រុកដោយសុវត្ថិភាព និងកិច្ចការពារជនរងគ្រោះដល់មជ្ឈដ្ឋានផ្ទាល់ពាក់ព័ន្ធនឹងការជួញដូរមនុស្ស៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
