នារសៀលថ្ងៃទី២៤ ខែមិថុនា ឆ្នាំ២០២៥នេះ ឯកឧត្តម អែល សៀត សមាជិកក្រុមប្រឹក្សាខេត្ត និងជាអនុប្រធានសាសនាខេត្តសៀមរាប បានដឹកនាំសហការី ចុះសួរសុខទុក្ខ និងនាំយកអំណោយជាគ្រឿងបរិភោគដែលជាអំណោយរបស់សប្បុរសជនប្រទេសម៉ាឡេស៊ី ចែកជូនបងប្អូនប្រជាពលរដ្ឋខ្មែរឥស្លាមជាង៣០គ្រួសារ ដែលកំពុងរស់នៅ និងប្រកបមុខរបរនៅលើទូកផ្ទះបណ្ដែតទឹក ក្នុងភូមិចុងឃ្នៀស សង្កាត់ចុងឃ្នៀស។
ឯកឧត្តម អែល សៀត មានប្រសាសន៍ថា សាសនិកខ្មែរឥស្លាមមានសេរីភាពពេញលេញក្នុងការគោរពប្រតិបត្តិសាសនារបស់ខ្លួនដូចជាពលរដ្ឋខ្មែរដែលកាន់សាសនាព្រះពុទ្ធដែរ ខណៈដែលគ្រប់សាសនាទាំងអស់មានគោលដៅតែមួយ គឺដឹកនាំមនុស្សឱ្យប្រព្រឹត្តអំពើល្អ មានគុណធម៌ សច្ចៈធម៌។ ជាពិសេសបងប្អូនទាំងអស់ សុទ្ធតែទទួលបានការយកចិត្តទុកដាក់ពីរាជរដ្ឋាភិបាលកម្ពុជា ក្រោមការដឹកនាំរបស់ សម្តេចតេជោ ហ៊ុន សែន ប្រធានព្រឹទ្ធសភា និង សម្តេចធិបតី ហ៊ុន ម៉ាណែត នាយករដ្ឋមន្ត្រី តាមរយៈការផ្ដល់កិច្ចគាំពារ ដោយគ្មានការរើសអើង ផ្ដល់ឱកាស និងសិទ្ធសេរីភាពគ្រប់សព្វបែបយ៉ាងដល់សហគមន៍ឥស្លាមកម្ពុជា។
ឯកឧត្តម បញ្ជាក់ថា ចំពោះអំណោយដែលបានផ្ដល់ជូននាពេលនេះ គឺបង្ហាញពីទឹកចិត្តរបស់សប្បុរសជន ក្នុងនាមសាសនិកឥស្លាមដូចគ្នាហើយក៏ជាការចូលរួមចំណែកដ៏សំខាន់មួយជាមួយរាជរដ្ឋាភិបាលកម្ពុជា ក្នុងការជួយដោះបន្ទុកខ្លះៗ ដល់អ្នកដែលមានការលំបាក ហើយសកម្មភាពនេះទៀតសោត ក៏ជាសក្ខីភាពនៃការចែករំលែកដែលបញ្ជាក់ពីភាតរភាពក្នុងនាមមនុស្សជាតិនៅក្នុងពិភពលោកតែមួយផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
