ព្រឹត្តិការណ៍បរិច្ចាគឈាម ក្រោមប្រធានបទ “យើងរួមគ្នាបរិច្ចាគឈាម ដើម្បីសង្គ្រោះជីវិត” ដែលរៀបចំឡើងដោយរដ្ឋបាលខេត្តសៀមរាប ត្រូវបានរៀបចំឡើងជាផ្លូវការ នៅថ្ងៃទី១៩ ខែមិថុនា ឆ្នាំ២០២៥នេះ ក្នុងនោះអាជ្ញាធរខេត្តសៀមរាប បានអំពាវនាវដល់សាធារណៈជនទូទៅ ចូលរួមបរិច្ចាគឈាមដោយការស្ម័គ្រចិត្ត ដើម្បីឧត្តមប្រយោជន៍មនុស្សធម៌ ជួយជីវិតមនុស្ស និងជាកាដូនៃសេចក្ដីស្រឡាញ់ ចេញពីបេះដូងយ៉ាងពិតប្រាកដជូនចំពោះជនរួមជាតិខ្មែរទាំងអស់គ្នា។
លោក នាក់ ណេរ៉ុន អភិបាលរងខេត្តសៀមរាប មានប្រសាសន៍ថា តម្រូវការឈាមសម្រាប់សង្គ្រោះជីវិតមនុស្សនៅតែបន្តកើតមានជារៀងរាល់ថ្ងៃ ហើយត្រូវការការចូលរួមជាបន្តបន្ទាប់ដោយគ្មានទីបញ្ចប់ដូចគ្នា។ ដើម្បីបង្កើនភាពងាយស្រួលក្នុងការស្វែងរកអ្នកមានប្រភេទឈាមដូចគ្នា ពេលមានតម្រូវការបន្ទាន់ក្នុងការសង្គ្រោះជីវិត គប្បីចងក្រងជាក្រុមៗដោយផ្អែកលើប្រភេទគ្រាប់ឈាម ដែលនេះជាយុទ្ធសាស្ត្រអាចជួយសង្គ្រោះជីវិតបានទាន់ពេលវេលា និងលឿនបំផុត។
លោកអភិបាលរងខេត្ត ក៏បានថ្លែងអំណរគុណចំពោះ ឯកឧត្តម ឧបនាយករដ្ឋមន្ត្រី ហ៊ុន ម៉ានី ដែលបានផ្ដួចផ្ដើម និងជំរុញឱ្យមានព្រឹត្តិការណ៍ដ៏មានអត្ថន័យនេះឡើង ដើម្បីចូលរួមចំណែកសំខាន់ក្នុងការជួយសង្គ្រោះជីវិតជនរួមជាតិ។ លោកសង្ឃឹមថា បន្ទាប់ពីព្រឹត្តិការណ៍នេះ ក្រុមគ្រូពេទ្យនឹងទទួលបានឈាមគ្រប់គ្រាន់សម្រាប់ការបំពេញបេសកកម្មជំនាញ ដូចជា ការវះកាត់ ការព្យាបាល និងករណីសង្គ្រោះបន្ទាន់ផ្សេងៗ។
លោកបន្តថា ជាការពិត ការបរិច្ចាគឈាម គឺជាទង្វើមនុស្សធម៌ ដែលយើងគ្រប់គ្នាអាចធ្វើបាន និងងាយស្រួលបំផុត។ ការបរិច្ចាគឈាមមិនត្រឹមតែមិនធ្វើឱ្យប៉ះពាល់ដល់សុខភាពប៉ុណ្ណោះទេ វាបានផ្ដល់អត្ថប្រយោជន៍ជាច្រើនទៀតដល់យើង។ ហេតុនេះយើងរួមគ្នាបរិច្ចាគឈាម ដើម្បីសង្គ្រោះជីវិតទាំងអស់គ្នា៕
អត្តបទ និងរូបភាព៖ លោក ហេង វន្នី
កែសម្រួល៖ លោក អ៊ុន ណារាជ្យ
