ក្នុងកិច្ចប្រជុំសម្របសម្រួលជាមួយម្ចាស់អាជីវកម្មសេវាកម្សាន្ត សណ្ឋាគារ ក្នុងក្រុងសៀមរាប នៅព្រឹកថ្ងៃទី១៧ ខែមិថុនា ឆ្នាំ២០២៥នេះ លោក នាក់ ណេរ៉ុន អភិបាលរងខេត្តសៀមរាប បានធ្វើការអំពាវនាវដល់ម្ចាស់អាជីវកម្មកម្សាន្តសប្បាយនានា ត្រូវជួយជំរុញដល់បុគ្គលិករបស់ខ្លួន ក្នុងការចូលរួមធ្វើតេស្តឈាម ស្វែងរកមេរោគអេដស៍ ខណៈបច្ចុប្បន្នខេត្តសៀមរាប មានអ្នកផ្ទុកមេរោគអេដស៍ចំនួន ៥ ១០៧នាក់ និងមានអ្នកផ្ទុកមេរោគនេះប្រមាណជា ២ ០០០នាក់ ដែលមិនឃើញមកទទួលការព្យាបាលបន្ត។
លោក នាក់ ណេរ៉ុន បញ្ជាក់ថា ជំងឺអេដស៍មិនមានថ្នាំព្យាបាលឲ្យជានោះទេ ប៉ុន្តែថ្នាំប្រឆាំងមេរោគនេះ បានធ្វើមេរោគចុះខ្សោយ រហូតដល់ពេលធ្វើតេស្តក៏អាចឃើញអវិជ្ជមាន ជាហេតុឲ្យអ្នកជំងឺគិតថា គាត់បានជាសះស្បើយ។ ចំណុចនេះហើយដែលជាគ្រោះថ្នាក់ ព្រោះថានៅពេលអ្នកជំងឺអេដស៍តេស្ដរកមេរោគអេដស៍លែងឃើញ ពួកគាត់ក៏ឈប់មកទទួលការព្យាបាល។ ដូច្នេះការឆ្លងរាលដាលក៏អាចបន្តកើតឡើងវិញផងដែរ។
លោកសូមអំពាវនាវដល់ម្ចាស់អាជីវកម្មកម្សាន្តទាំងអស់ ជំរុញឱ្យបុគ្គលិកដើម្បីធ្វើតេស្តរកមេរោគអេដស៍ទាំងអស់គ្នា ដែលនេះមិនមែនតែជាការគិតរឿងឆ្លងមួយមុខទេ ប៉ុន្តែវាជាការរួមគ្នាគិតគូរពីការអភិវឌ្ឍជាតិទាំងអស់គ្នា។ លោកថាការធ្វើតេស្តរកមេរោគអេដស៍នេះ ក៏ជាផ្នែកមួយក្នុងការគិតគូររបស់រាជរដ្ឋាភិបាលកម្ពុជា ក្នុងការជួយដល់អ្នកវិជ្ជមានមេរោគអេដស៍ ដោយអ្នកទាំងនោះនឹងទទួលបានបណ្ណសមធម៌ សម្រាប់ប្រើក្នុងការព្យាបាលដោយឥតគិតថ្លៃ។
ព័ត៌មានជាតិ ថ្មីៗ
យោងតាមក្រសួងបានឱ្យដឹងថា ប្រទេសកម្ពុជា ត្រូវបានពិភពលោកទទួលស្គាល់ថា ស្ថិតក្នុងគន្លងផ្លូវក្នុងការឈានទៅសម្រេចបានគោលដៅសកល ៩៥%-៩៥%-៩៥% មានន័យថា ៩៥%នៃអ្នកដែលមិនបានដឹងខ្លួនថាផ្ទុកមេរោគ អេដស៍បានដឹងពីស្ថានភាពនៃមេរោគអេដស៍របស់ខ្លួន, ៩៥% បានដឹងខ្លួនថា ផ្ទុកមេរោគអេដស៍បានទទួល ការព្យាបាលដោយឱសថប្រឆាំងមេរោគអេដស៍ និង ៩៥%នៃអ្នកដែលបានទទួលការព្យាបាលមានបន្ទុក មេរោគអេដស៍ក្នុងឈាមត្រូវបានបង្ក្រាប។ ជាលទ្ធផលនៅឆ្នាំ២០២៣ សម្រេចបាន ៨៩% នៃ៩៥%ទី១, ៩៨% នៃ៩៥ទី២ និង ៩៨% នៃ៩៥%ទី៣៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
