នៅថ្ងៃទី៣០ ខែមិថុនា ឆ្នាំ២០២៥ មន្ទីរសុខាភិបាលខេត្តសៀមរាប បានបើកកិច្ចប្រជុំប្រចាំត្រីមាសទី២ ឆ្នាំ២០២៥ របស់ក្រុមការងារពិសេសលុបបំបាត់ជំងឺគ្រុនចាញ់ថ្នាក់ខេត្ត ដឹកនាំដោយ លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលនៃរដ្ឋបាលខេត្តសៀមរាប ដើម្បីពង្រឹងតួនាទីក្រុមការងារ ធ្វើបច្ចុប្បន្នភាពពីស្ថានភាពជំងឺគ្រុនចាញ់ ពិភាក្សាលើបញ្ហាប្រឈម និងរកដំណោះស្រាយ ក្នុងន័យបន្តគោលដៅលុបបំបាត់ជំងឺគ្រុនចាញ់។
លោកវេជ្ជបណ្ឌិត ក្រុស សារ៉ាត់ បានជំរុញគ្រប់អ្នកពាក់ព័ន្ធបន្តការតេស្ដស្រាវជ្រាវរកមេរោគគ្រុនចាញ់ និងចែកមុងជ្រលក់ថ្នាំដល់ប្រជាជនគោលដៅ បន្តធានាឱ្យមានតេស្ដ និងថ្នាំគ្រប់គ្រាន់នៅតាមតំបន់គោលដៅឱ្យបានជាប់ជាប្រចាំ និងត្រូវបន្តចុះអប់រំផ្សព្វផ្សាយ អំពីវិធីបង្ការជំងឺដែលឆ្លង ដោយសារសត្វមូសឱ្យបានទូលំទូលាយ ដើម្បីសម្រេចគោលដៅលុបបំបាត់ជំងឺគ្រុនចាញ់នាពេលខាងមុខ ជាពិសេសចូលរួមជាមួយយុទ្ធសាស្រ្តរាជរដ្ឋាភិបាល ក្នុងការសម្រេចគោលដៅប្រទេសកម្ពុជាឲ្យមានចំណូលមធ្យមកម្រិតខ្ពស់នៅឆ្នាំ២០៣០។
ព័ត៌មានជាតិ ថ្មីៗ
លោកវេជ្ជបណ្ឌិត បន្តថា ក្នុងការលុបបំបាត់បញ្ហានេះ ដើម្បីបង្កើនប្រសិទ្ធភាពថ្នាំ យើងក៏ត្រូវមានការផ្លាស់ប្ដូរដ៏សំខាន់មួយក្នុងការប្រើប្រាស់ឱសថព្យាបាលជំងឺគ្រុនចាញ់ចំពោះមនុស្សពេញវ័យ ឱសថអាតេស៊ុយណាត-ម៉េហ្គូគីន ១០០/២០០mg ដែលបានផុតកំណត់ប្រើប្រាស់ក្នុងខែមិថុនានេះ នឹងត្រូវជំនួសដោយ ឱសថអាតេស៊ុយណាត-ពីរ៉ូណារីឌីន ១៨០/៦០mg ដែលមានសុពលភាពប្រើប្រាស់ចាប់ពីថ្ងៃទី១ ខែកក្កដា ឆ្នាំ២០២៥តទៅ។
លោកក៏បានណែនាំដល់ក្រុមការងារ ដោយសាររដូវវស្សាបានមកដល់ សម្រាប់នៅតាមសហគមន៍អាចឆ្លងជំងឺតាមរយៈសត្វមូស ដូច្នេះសំណូមពរឱ្យបន្តជួយផ្សព្វផ្សាយអំពីវិធីបង្ការជំងឺដែលឆ្លងដោយសារសត្វមូសដែកគោលញី ក៏ដូចជាការសំរានក្នុងមុង ការសម្អាតបរិស្ថាន និងកម្ចាត់ជម្រកមូសជាដើម៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
