បើតាមលោកឧត្ដមសេនីយ៍ទោ ហួត សុធី ស្នងការនគរបាលខេត្ដសៀមរាប បានឱ្យដឹងថា គិតត្រឹមរយៈពេល៥ខែ ឆ្នាំ២០២៥ សមត្ថកិច្ចខេត្តសៀមរាប បានធ្វើការបង្ក្រាបករណីគ្រឿងញៀនបានចំនួន២២៣ករណី ឃាត់ខ្លួនមនុស្សបានចំនួន ១ ០៨៨នាក់ និងរឹបអូសគ្រឿនញៀនបានជិត ១៨គីឡូក្រាម។
លោកឧត្ដមសេនីយ៍ទោ ហួត សុធី បានឱ្យដឹងទៀតថា បទល្មើសទាំង ២២៣ករណី រួមមានករណីជួញដូរ និងរក្សាទុក ១២២ករណី ឃាត់ខ្លួន៣២៣នាក់, ករណីប្រើប្រាស់៨០ករណី ឃាត់ខ្លួន៧៥១នាក់ និងអនុវត្តដីកាចំនួន២១ករណី ឃាត់ខ្លួន១១នាក់។ ជាមួយគ្នានោះ នៅក្នុងមជ្ឈមណ្ឌលស្តារនីតិសម្បទាគ្រឿងញៀនខេត្តសៀមរាប បច្ចុប្បន្នបានទទួលអ្នកញៀនគ្រឿងញៀនចំនួន ៨៣៦នាក់ ស្រី៦៤នាក់។
សូមជម្រាបថា លោកស្នងការនគរបាលខេត្ត បញ្ជាក់បែបនេះ ក្នុងទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ឆ្នាំ២០២៥ ក្រោមប្រធានបទ “រួមគ្នាបង្ការ ទប់ស្កាត់ និងកាត់ផ្តាច់ឫសគល់នៃបញ្ហាគ្រឿងញៀននៅកម្ពុជា” នៅខេត្តសៀមរាប នាថ្ងៃទី០១ ខែកក្កដា ឆ្នាំ២០២៥នេះ។
ក្នុងឱកាសនោះដែរ លោក សំកុល សុចិត្រា អភិបាលរងខេត្ត និងជាប្រធានលេខាធិការដ្ឋាននៃគណៈកម្មាធិការត្រួតពិនិត្យគ្រឿងញៀនខេត្ត បានអំពាវនាវដល់យុវជន សូមកុំចង់សាកល្បងគ្រឿងញៀន នឹងត្រូវចៀសឱ្យឆ្ងាយពីគ្រឿងញៀន កុំជឿតាមការញុះញង់បោកបញ្ឆោតរបស់នរណាម្នាក់ ឈានដល់ការប្រើប្រាស់រហូតធ្លាក់ខ្លួនជាអ្នកញៀនគ្រឿងញៀន ដែលធ្វើឱ្យប៉ះពាល់ដល់អនាគតរបស់ខ្លួន៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
