ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុកប្រាសាទបាគង អាណត្តិទី៤ នៅថ្ងៃទី០២ ខែកក្កដា ឆ្នាំ២០២៥នេះ លោក ទៀប ប៊ុនឈួយ ប្រធានក្រុមប្រឹក្សាស្រុក បានជំរុញដល់អាជ្ញាធរត្រូវបង្កើនភាពជិតស្និទ្ធជាមួយបងប្អូនប្រជាពលរដ្ឋក្នុងមូលដ្ឋាន ក្ដាប់ឱ្យបាននូវរាល់បញ្ហា និងសំណូមពរនានា ដើម្បីយកមកធ្វើការដោះស្រាយជាមួយអ្នកពាក់ព័ន្ធបានលឿន និងមានប្រសិទ្ធភាព សំដៅធានាលើកកម្ពស់ការចូលរួមរបស់ប្រជាពលរដ្ឋក្នុងការអភិវឌ្ឍន៍មូលដ្ឋាន។
លោក ទៀប ប៊ុនឈួយ បានបញ្ជាក់ថា សម្រាប់វេទិកានាពេលនេះដែរ យើងក៏ទទួលបាននូវក្ដីកង្វល់ និងសំណូមពរមួយចំនួនពីបងប្អូនប្រជាពលរដ្ឋយើង ដូចជាការស្នើសុំជួលជុលផ្លូវមួយកន្លែងក្នុងឃុំកន្ទ្រាំង, ស្នើដាក់បន្ទះសូឡាតាមបណ្ដោយផ្លូវភូមិស្រិតខាងកើត, បញ្ហាចាក់សំរាមនៅក្នុងមូលដ្ឋានពាសវាលពាសកាល និងការស្ដាដីក្នុងប្រឡាយជាដើម។ ចំពោះក្ដីកង្វល់ និងសំណូមពរទាំងអស់នេះ ត្រូវបានអាជ្ញាធរជំនាញធ្វើការបកស្រាយជូនបងប្អូនភ្លាមៗផងដែរ។
ព័ត៌មានជាតិ ថ្មីៗ
លោកក៏សូមថ្លែងការកោតសរសើរដល់ក្រុមការងារក្រុមប្រឹក្សាស្រុក និងអ្នកពាក់ព័ន្ធទាំងអស់ ដែលបានអនុវត្តការងារបានយ៉ាងល្អប្រសើរ និងបានដោះស្រាយបញ្ហាប្រឈមនានារបស់បងប្អូនប្រជាពលរដ្ឋបានជាបន្តបន្ទាប់ទាន់ពេលវេលា និងប្រកបដោយការទទួលខុសត្រូវខ្ពស់ និងសូមបន្តក្ដាប់ឱ្យបានរាល់ក្ដីកង្វល់ និងបញ្ហាប្រឈមរបស់បងប្អូនប្រជាពលរដ្ឋ យកមកដោះស្រាយបញ្ហាឱ្យបានទាន់ពេលវេលា ជាពិសេសពង្រឹងលើការងារផ្ដល់សេវាសាធារណៈក្នុងមូលដ្ឋាន។
លោកបន្តថា ប្រកាសទាំងអស់នេះហើយ ជារឿងសំខាន់ក្នុងការចូលរួមអនុវត្តគោលនយោបាយរាជរដ្ឋាភិបាល នៃយុទ្ធសាស្ត្របញ្ចកោណ ដំណាក់កាលទី១ ដើម្បីកំណើនការងារសមធម៌ ប្រសិទ្ធភាព និងចីរភាព ដែលមានការកែទម្រង់ព្រមទាំងពង្រឹងអភិបាលកិច្ចស្នូល បង្កើនប្រសិទ្ធភាពការងារ និងអភិវឌ្ឍន៍ក្នុងមូលដ្ឋាន៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
