នៅព្រឹកថ្ងៃទី០៧ ខែកក្កដា ឆ្នាំ២០២៥នេះ ឯកឧត្តម ហេង ធូ ប្រធានក្រុមការងារថ្នាក់ជាតិចុះមូលដ្ឋានឃុំខ្នារសណ្ដាយ ដឹកនាំក្រុមការងារនាំយកទៀនព្រះវស្សា និងទ័យវត្ថុមួយចំនួនប្រគេនដល់វត្តចំនួន៤ មានវត្តប្រាសាទនាគគូរ វត្តប្រិយ៍ វត្តនាគខ្មៅ និងវត្តសិលាចារ្យបន្ទាយស្រី ស្ថិតក្នុងស្រុកបន្ទាយស្រី ខេត្តសៀមរាប ដោយមានការចូលរួមពីអាជ្ញាធរមូលដ្ឋាន មន្ត្រីរាជការ លោកយាយលោកតា និងប្រជាពលរដ្ឋជាច្រើនរូប។
ឯកឧត្តម ហេង ធូ មានប្រសាសន៍ថា ព្រះពុទ្ធសាសនា គឺជាសាសនារបស់រដ្ឋ ដែលយើងទាំងអស់គ្នាមានជំនឿ និងគោរពប្រតិបត្តិតាម ព្រោះថាព្រះពុទ្ធសាសនាបានផ្តល់ការអប់រំផ្លូវចិត្តឱ្យប្រព្រឹត្តនូវអំពើល្អ ចេះស្រឡាញ់រាប់អាន ជួយយកអាសាគ្នា សាមគ្គីភាពគ្នា រស់នៅក្នុងសង្គមមួ ដោយសុខដុមរមនា។ ទីវត្តអារាម គឺជាមូលដ្ឋានគ្រឹះនៃអក្សរសាស្ត្រខ្មែរ ដែលជាជង្រុកនៃសម្បត្តិវប្បធម៌ជាតិ និងជាថ្នាលបណ្តុះបណ្តាលនូវធនធានមនុស្ស ទាំងវិស័យអាណាចក្រ និងពុទ្ធចក្រ។
ឯកឧត្តម លើកឡើងថា ស្របពេលដែលប្រទេសកម្ពុជា មានសុខសន្តិភាពពេញលេញ ទាំងវិស័យពុទ្ធចក្រ និងអាណាចក្រ ក៏កំពុងមានការរីកចម្រើនគួរឱ្យកត់សម្គាល់។ ជាក់ស្ដែងមូលដ្ឋាននៃស្រុកបន្ទាយស្រី ក៏កំពុងមានសន្ទុះអភិវឌ្ឍន៍ទៅមុខឥតឈប់ឈរក្រោមនយោបាយ ឈ្នះ ឈ្នះ របស់ សម្ដេចតេជោ ហ៊ុន សែន និងដឹកនាំបន្តដោយ សម្ដេចធិបតី ហ៊ុន ម៉ាណែត នាយករដ្ឋមន្ត្រី បានធ្វើឱ្យគ្រប់វិស័យររីកចម្រើនជាបន្តបន្ទាប់ ទាំងផ្លូវថ្នល់ សាលារៀន មន្ទីរពេទ្យ វត្តអារាម និងហេដ្ឋារចនាសម្ព័ន្ធសំខាន់ៗជាច្រើនទៀត។
ព័ត៌មានជាតិ ថ្មីៗ
ឯកឧត្តម បន្តថា ការនាំយកនូវទៀនព្រះវស្សា ព្រមទាំងគ្រឿងឧបភោគ បរិភោគ និងបច្ច័យយកមកវេរប្រគេនដល់ព្រះសង្ឃនាពេលនេះ គឺដើម្បីព្រះសង្ឃយកទៅដុតបំភ្លឺបូជាថ្វាយព្រះ និងសិក្សារៀនសូត្រនូវគម្ពីរធម៌ វិន័យព្រះសម្មាសាម្ពុទ្ធ ព្រះបរមគ្រូនៃយើង និងជាពេលដែលព្រះសង្ឃមិនអាចចេញទៅបិណ្ឌបាតនៅខាងក្រៅបាន៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
