ថ្លែងក្នុងពិធីប្រកាសចូលកាន់មុខតំណែងអភិបាលរងក្រុងសៀមរាប នារសៀលថ្ងៃទី០៧ ខែកក្កដានេះ លោក ង៉ូវ សេងកាក់ អភិបាលរងខេត្ត បានណែនាំដល់អាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវយកចិត្តទុកដាក់ និងសម្របសម្រួលទទួលបងប្អូនពលករដែលត្រឡប់ពីប្រទេសថៃ ដោយធានាបាននូវសុវត្ថិភាព សន្តិសុខ ត្រូវក្ដាប់ឱ្យបាននូវទិន្នន័យ និងសាកសួរពីមុខរបរ និងជំនាញពួកគាត់ ដើម្បីត្រៀមឆ្លើយតប និងស្វែងរកការងារសមស្របជូនពួកគាត់។
លោក ង៉ូវ សេងកាក់ ក៏បានជំរុញដល់អាជ្ញាធរក្រុង ត្រូវបន្តលើកកម្ពស់សន្តិសុខសណ្ដាប់ធ្នាប់ក្នុងមូលដ្ឋាន ជំរុញការអភិវឌ្ឍលើគ្រប់វិស័យ លើកកម្ពស់ជីវភាពរស់នៅប្រជាពលរដ្ឋ ជាពិសេសត្រូវគ្រប់គ្រងឱ្យបានអ្នកប្រកបរបរសេដ្ឋកិច្ចក្រៅប្រព័ន្ធ ដោយហេតុថាក្រុងសៀមរាប ភាគច្រើនប្រកបអាជីវកម្មសេវាកម្មទេសចរណ៍ ហើយអ្នកប្រកបរបរសេដ្ឋកិច្ចក្រៅប្រព័ន្ធជាចលករជួយឱ្យសេដ្ឋកិច្ចក្នុងខេត្តមានដំណើរការ។ ជាមួយគ្នានេះ ការដោះស្រាយវិវាទក្រៅប្រព័ន្ធតុលាការ អាជ្ញាធរក្រុងត្រូវបន្តសហការរួមគ្នាដោះស្រាយជូនប្រជាពលរដ្ឋប្រកបដោយភាពត្រឹមត្រូវ និងតម្លាភាព។
លោកអភិបាលរងខេត្ត ក៏បានណែនាំរដ្ឋបាលក្រុង ត្រូវបន្តការងារគ្រប់គ្រងមន្ត្រីរាជការ និងមន្ត្រីកិច្ចសន្យាឱ្យមានប្រសិទ្ធិភាពខ្ពស់ ដោយផ្ដោតសំខាន់លើការអនុវត្តការងារតាមតួនាទីភារកិច្ចតាមជំនាញ តាមរយៈការពង្រឹង និងបែងចែកការងារឱ្យបានច្បាស់លាស់ សំដៅធ្វើយ៉ាងណាឱ្យយន្តការការងារប្រព្រឹត្តទៅដោយតម្លាភាព គណនេយ្យភាព ឈរលើស្មារតី សាមគ្គីភាព និងការយោគយល់គ្នា។ ជាមួយនោះ លោកក៏បានជំរុញដល់អភិបាលរងក្រុង ដែលទើបប្រកាសចូលកាន់មុខតំណែង ត្រូវអនុវត្តការងារឱ្យអស់សមត្ថភាព មានកិច្ចប្រតិបត្តិការល្អជាមួយគ្រប់មន្ទីរអង្គភាព ភូមិសង្កាត់ ជាពិសេសប្រជាពលរដ្ឋក្នុងមូលដ្ឋាន រួមគ្នាអភិវឌ្ឍន៍ក្រុងសៀមរាប ឱ្យកាន់តែមានការរីកចម្រើនសម្រេចបានសមិទ្ធផលថ្មីៗ និងស្នាដៃថ្មីៗបន្ថែមទៀត។
សូមជម្រាបថា លោកស្រី ម៉ៅ សុខហៀង ឋានន្តរសក្តិឧត្តមមន្ត្រី ថ្នាក់លេខ៣ និង លោក ស៊ាន គឹមឋាន ឋានន្តរសក្តិនាយក្រមការថ្នាក់លេខ៦ ត្រូវបានប្រកាសចូលកាន់មុខតំណែងជា អភិបាលរង នៃគណៈអភិបាលក្រុងសៀមរាប តាមសេចក្ដីប្រកាស ស្ដីពីការផ្ទេរភារកិច្ច និងតែងតាំងមន្រ្តីរាជការលេខ ៥៤៦៤ ប្រក របស់ក្រសួងមហាផ្ទៃ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
