អនុវត្តតាមអនុសាសន៍ណែនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី និងថ្នាក់ដឹកនាំពាក់ព័ន្ធ រដ្ឋបាលខេត្តសៀមរាប កំពុងយកចិត្តទុកដាក់ខ្ពស់ ក្នុងការសម្របសម្រួលជួយបងប្អូនប្រជាពលរដ្ឋក្នុងការដឹកជញ្ជូនពីតាមច្រកព្រំដែនកម្ពុជា-ថៃ រហូតដល់គេហដ្ឋានរបស់ពួកគាត់គ្រប់ៗ ជាមួយនឹងការផ្ដល់ជូននូវព័ត៌មានជុំវិញការផ្ដល់ឱកាសការងារ និងការបណ្ដុះបណ្ដាលជំនាញវិជ្ជាជីវៈជូនពួកគាត់។
ក្នុងការយកចិត្តទុកដាក់នេះ បងប្អូនប្រជាពលរដ្ឋខ្មែរដែលទើបត្រឡប់មកពីប្រទេសថៃ មកកាន់ស្រុកកំណើតវិញ ពួកគាត់បានបង្ហាញក្ដីត្រេកអរ និងថ្លែងអំណរគុណ ចំពោះរាជរដ្ឋាភិបាលកម្ពុជា ថ្នាក់ដឹកនាំគ្រប់ជាន់ថ្នាក់ ជាពិសេសរដ្ឋបាលខេត្ត ដែលបានជួយសម្របសម្រួលដឹកជញ្ជូនពួកគាត់ ចាប់ពីច្រកព្រំដែនរហូតដល់គេហដ្ឋានគ្រប់ៗគ្នា ព្រមទាំងរៀបចំនូវអាហារដល់ពួកគាត់ផងដែរ។ ពួកគាត់ក៏បានថ្លែងអំណរគុណ ចំពោះការយកចិត្តទុកដាក់បំផុតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលបានគិតគូរដល់សុខទុកបងប្អូនប្រជាពលរដ្ឋខ្មែរយើង ពិសេសបានផ្ដល់នូវឱកាសការងារបន្ថែមដល់ពួកគាត់ផងដែរ។
លោក លី សារី អភិបាលរងខេត្ដ បានឱ្យដឹងថា បច្ចុប្បន្នក្រុមការងារខេត្ត កំពុងសម្របសម្រួលបងប្អូនប្រជាពលរដ្ឋក្នុងការដឹកជញ្ជូនពីតាមច្រកព្រំដែនរហូតដល់គេហដ្ឋាន។ ជាមួយគ្នានេះ អាជ្ញាធរខេត្ត អង្គការដៃគូរ រួមនឹងស្ថាប័នផ្សេងៗ ក៏បានត្រៀមខ្លួនរួចជាស្រេចក្នុងការជួយសម្របសម្រួលស្វែងរកការងារ និងផ្ដល់ជំនាញវិជ្ជាជីវៈមួយដែលសមស្រប ជូនដល់បងប្អូនពលករយើងដែលទើបត្រឡប់មកពីក្រៅប្រទេស ធ្វើយ៉ាងណាមានភាពងាយស្រួលក្នុងការរកបានការងារពេលមកដល់ស្រុកកំណើតវិញ៕
ព័ត៌មានជាតិ ថ្មីៗ
អត្ថបទ និងរូបភាព៖ រដ្ឋបាលខេត្តសៀមរាប
