គិតចាប់តាំងពីខែធ្នូ ឆ្នាំ២០២៤ ដល់ខែកក្កដា ឆ្នាំ២០២៥នេះ មជ្ឈមណ្ឌលការងារខេត្តសៀមរាប បានផ្ដល់សេវាផ្សេងៗដល់អ្នកស្វែងរកឱកាសការងារជាង១ ០០០នាក់ ក្នុងនោះមានជាង ៥០០នាក់ ត្រូវបានមជ្ឈមណ្ឌលបញ្ជូនទៅកាន់កន្លែងការងារ និងសិក្សាជំនាញ ហើយជាលទ្ធផលមានប្រមាណ ២០០នាក់ កំពុងទទួលបានការងារ និងសិក្សាជំនាញ។
លោក សៀង សុខុន ប្រធានមជ្ឈមណ្ឌលការងារខេត្តសៀមរាប បានបង្ហាញថា មជ្ឈមណ្ឌលការងារខេត្តសៀមរាប ជាស្ថាប័នរដ្ឋស្ថិតក្រោមទីភ្នាក់ងារជាតិមុខរបរ និងការងារនៃក្រសួងការងារ និងបណ្ដុះបណ្ដាលវិជ្ជាជីវៈ ដែលផ្ដល់សេវារបស់មជ្ឈមណ្ឌលគឺឥតគិតថ្លៃ ដោយគ្រាន់តែបងប្អូនមកចុះឈ្មោះផ្ទាល់នៅមជ្ឈមណ្ឌល ដោយភ្ជាប់នូវឯកសារមួយចំនួន ដូចជា អត្តសញ្ញាណបណ្ណ ឬប្រវត្តិរូបសង្ខេបដើម។ មជ្ឈមណ្ឌលមានទីតាំងក្នុងបរិវេណវិទ្យាស្ថានពហុបច្ចេកទេសភូមិភាគតេជោសែនសៀមរាប
លោក សៀង សុខុន បានឱ្យដឹងថា បច្ចុប្បន្នសម្រាប់ខេត្តសៀមរាប គឺមានតម្រូវការប្រមាណជាង៣០០កន្លែងប៉ុណ្ណេះ ហើយសម្រាប់ការងារមួយចំនួន គឺផ្ដោតសំខាន់ទៅលើវិស័យទេសចរណ៍ជាធំ។ តែយ៉ាងណាមជ្ឈមណ្ឌលក៏មានការសហការជាមួយបណ្ដាខេត្តជាប់ខេត្តសៀមរាប ក្នុងការស្វែងរកការងារធ្វើផងដែរ ទៅតាមតម្រូវការជំនាញ និងបច្ចេកទេសរបស់បងប្អូន ដោយបច្ចុប្បន្នម្ចាស់ក្រុមហ៊ុនសហគ្រាសមួយចំនួនកំពុងធ្វើការជាមួយអាជ្ញាធរក្នុងការចុះផ្សព្វផ្សាយឱកាសការងារជូនប្រជាពលរដ្ឋ និងជាពិសេសបងប្អូនដែលទើបវិលត្រឡប់មកពីប្រទេសថៃ។
ព័ត៌មានជាតិ ថ្មីៗ
សូមបញ្ជាក់ថា មជ្ឈមណ្ឌលការងារជាស្ថាប័នមួយស្ថិតក្រោមទីភ្នាក់ងារជាតិមុខរបរការងារនៃក្រសួងការងារបណ្ដុះបណ្ដាលវិជ្ជាជីវៈ ចំពោះការផ្ដល់សេវានានាជូនប្រជាពលរដ្ឋដែលមានដូចជា៖ ការផ្តល់សេវាជូនអ្នកស្វែងរកការងារធ្វើឬអ្នកចង់ផ្លាស់ប្ដូរការងារ ការផ្តល់សេវាជូនក្រុមហ៊ុនសហគ្រាសដែលពួកគាត់ត្រូវការជ្រើសរើសបុគ្គលិក និងការផ្ដល់សេវាដល់គ្រឹះស្ថានអប់រំបណ្ដុះបណ្ដាលដែលគាត់ត្រូវការជ្រើសរើសសិស្សក្នុងការទៅរៀនជំនាញ៕
អត្ថបទ៖ លោកស្រី ភី រចនា
កែសម្រួល៖ លោក អ៊ុន ណារាជ្យ
