ក្រុមយុវជនកម្ពុជា និងយុវជនមកពីតៃវ៉ាន់ នឹងចំណាយពេល១០ថ្ងៃ រួមគ្នាធ្វើការងារស្ម័គ្រចិត្ត ជួយការងារសង្គមដូចជា ការបង្រៀនភាសាអង់គ្លេស ការធ្វើសម្ភារប្រើប្រាស់ដាក់ក្នុងសាលាបឋមសិក្សាគោកចក ក្រុងសៀមរាប និងការចែករំលែក ផ្លាស់ប្តូរបទពិសោធន៍ និងវប្បធម៌គ្នាទៅវិញទៅមក តាមរយះអង្គការសកម្មភាពយុវជន (CYA) ខណៈពួកគេថា កម្ពុជាពិតជាមួយសុវត្ថិភាព គួរឱ្យចង់រស់នៅ ផ្ទុយពីការផ្សព្វផ្សាយរបស់សារព័ត៌មានបរទេសមួយចំនួននៅលើបណ្ដាញសង្គម។
តំណាងក្រុមយុវជនតៃវ៉ាន់ បានអះអាងថា ដំបូងឡើយអាណាព្យាបាលរបស់ពួកគេមិនអនុញ្ញាតឱ្យធ្វើដំណើរមកកម្ពុជានោះទេ ព្រោះបារម្ភពីសុវត្ថិភាព។ ប៉ុន្តែពេលបានមកដល់កម្ពុជា ពិតជាបានផ្លាស់ប្តូរគំនិតពួកគេទាំងស្រុង ព្រោះកម្ពុជាពិតជាមានសុវត្ថិភាព ប្រជាជនរួសរាយរាក់ទាក់ ស្មោះត្រង់ និងមានវប្បធម៌ដ៏សម្បូរបែប ដែលអាចឱ្យពួកគេបានស្វែងយល់ រៀនសូត្រ ក៏ដូចជាចែករំលែកទៅវិញទៅមកជាមួយយុវជនកម្ពុជា។
ដោយឡែកតំណាងយុវជនកម្ពុជា បានលើកឡើងថា តាមរយៈអង្គការសកម្មភាពយុវជនកម្ពុជា យុវជនមួយចំនួនទទួលបានបទពិសោធន៍ជាច្រើន ក្រៅពីការសិក្សានៅក្នុងថ្នាក់ពួកគេអាចបង្កើតទំនាក់ទំនងល្អក្នុងសង្គម បង្កើនការជឿជាក់លើខ្លួនឯង បណ្ដុះស្មារតីក្រុម ហើយចំណុចទាំងអស់នេះ ជាកត្តាចាំបាច់សម្រាប់ពួកគេយកទៅប្រើប្រាស់ក្រោយពេលបញ្ចប់ការសិក្សា មានការងារល្អ និងអាចនាំឱ្យពួកគេទទួលបានឱកាសទៅសិក្សានៅប្រទេសថែមទៀតផង។
ព័ត៌មានជាតិ ថ្មីៗ
សូមបញ្ជាក់ថា អង្គការសកម្មភាពយុវជនកម្ពុជា បង្កើតឡើងតាំងពីឆ្នាំ២០១០ មានគោលដៅជំរុញ លើកទឹកចិត្ត ផ្តល់ឱកាសដល់យុវជនកម្ពុជា និងយុវជនមកពីជុំវិញពិភពលោក បានចូលរួមការងារសង្គម តាមរយៈវិស័យអប់រំ បរិស្ថាន វប្បធម៌ និងការអភិវឌ្ឍន៍ប្រកបដោយនិរន្តរភាព។ ក្នុងរយៈពេល១៥ឆ្នាំកន្លងមកនេះ មានយុវជនប្រមាណ ៣ ៦០០នាក់ មកពីប្រទេសផ្សេងគ្នានៅលើពិភពលោក បានចូលរួមស្ម័គ្រចិត្តនៅកម្ពុជា និងបានជួយប្រជាពលរដ្ឋកម្ពុជាប្រមាណ ៥៤ ០០០នាក់ តាមរយៈគម្រោងនីមួយៗ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
