ឯកឧត្តម សៀង ណាំ តំណាងមណ្ឌលខេត្តសៀមរាប លើកឡើងថា កម្ពុជាត្រូវការសន្តិភាព និងមិនចង់បានសង្គ្រាមទេ តែបើប្រទេសជិតខាងមិនឱ្យយើងរស់នៅដោយសុខសាន្ត យើងក៏ត្រូវប្រើសិទ្ធិបាញ់តបតការពារខ្លួន ដើម្បីការពារអធិបតេយ្យភាព បូរណភាពទឹកដីរបស់យើងពីការរំលោភបំពាន។
ក្នុងឱកាសចុះសួរសុខទុក្ខ និងចែកគ្រឿងឧបភោគបរិភោគជូនជនភៀសសឹក ដែលកំពុងស្នាក់នៅកន្លែងសុវត្ថិភាពក្នុងស្រុកសូទ្រនិគម ខេត្តសៀមរាប នៅទី២៧ ខែកក្កដានេះ ឯកឧត្តម សៀង ណាំ បញ្ជាក់ថា ទង្វើរបស់កងទ័ពថៃ បានគំរាមកំហែង បំផ្លិចបំផ្លាញហេដ្ឋារចនាសម្ព័ន្ធជាច្រើន ជាពិសេសប្រាសាទព្រះវិហារ ដែលជាសម្បត្តិបេតិកភណ្ឌពិភពលោក។ នេះបង្ហាញយ៉ាងច្បាស់ថា កងទ័ពថៃគួរឱ្យស្អប់ខ្ពើម ឈ្លានពានគេដោយឥតអៀនខ្មាស ទាត់ចោលច្បាប់អន្តរជាតិថែមទៀតផង។
ឯកឧត្តម លើកឡើងថា កម្ពុជាមានមូលដ្ឋានច្បាប់រឹងមាំ ដើម្បីតតាំងជាមួយថៃនៅតុលាការយុត្តិធម៌អន្តរជាតិ ហើយឯកសារច្បាប់អន្តរជាតិទាំងអស់សុទ្ធតែបានបញ្ជាក់ថា ថៃកំពុងរំលោភបំពានលើអធិបតេយ្យភាពកម្ពុជា មិនថានៅប្រាសាទតាក្របី ប្រាសាទតាមាន់តូច ប្រាសាទតាមាន់ធំ និងតំបន់មុំបីនោះទេ។ ផ្ទុយពីកម្ពុជា ថៃមានត្រឹមតែផែនទីដែលគូសដោយឯកតោភាគីប៉ុណ្ណោះ។ កម្ពុជាអត់ធ្មត់ សង្កត់ចិត្តសម្បើមណាស់ នៅចំពោះមុខការបំពាន និងការញុះញង់របស់ថៃ តែភាពអត់ធ្មត់របស់កម្ពុជាមានកម្រិត។ ជានិច្ចកាល កម្ពុជាតែងប្រកាន់ជំហរចង់ដោះស្រាយតាមផ្លូវចរចា និងការទូត តែផ្ទុយទៅវិញសង្គ្រាមបានផ្ទុះឡើងនៅពេលនេះ គឺភាគីថៃជាអ្នកផ្ដើមមុន។
លោក គឹម វណ្ណៈ អភិបាលស្រុកសូទ្រនិគម បានឱ្យដឹងថា ក្នុងស្រុកសូទ្រនិគម មានបងប្អូនដែលជម្លៀសមកស្នាក់នៅបច្ចុប្បន្នជាង៤០០គ្រួសារ។ ជាមួយគ្នានេះ លោកសូមថ្លែងអំណរគុណចំពោះទឹកចិត្តរបស់សប្បុរសជន ដែលបានរួមចំណែកជាធនធានផ្ទាល់ខ្លួន ដើម្បីផ្ដល់ជាអំណោយគ្រឿងឧបភោគ បរិភោគ ចែកជូនដល់ជនភៀសសឹកជម្លៀសពីតំបន់រងគ្រោះដោយការវាយប្រហាររបស់កងទ័ពថៃ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
