ក្នុងឱកាសទទួលអំណោយជាគ្រឿងឧបភោគបរិភោគ សម្ភារប្រើប្រាស់ រួមនិងថវិកា ដែលបានមកពីការចូលរួមរបស់បងប្អូនប្រជាពលរដ្ឋខ្មែរឥស្លាមក្នុងខេត្តសៀមរាប តាមរយៈ ឯកឧត្តម អែល សៀត អនុប្រធានសាសនាឥស្លាមខេត្ត នារសៀលថ្ងៃទី២៦ ខែកក្កដានេះ ឯកឧត្តម ប្រាក់ សោភ័ណ អភិបាលខេត្តសៀមរាប បានថ្លែងអំណរគុណចំពោះទឹកចិត្តដ៏ស្មោះសររបស់បងប្អូនប្រជាពលរដ្ឋខ្មែរឥស្លាម រួមនឹងបងប្អូនប្រជាពលរដ្ឋទូទៅទាំងអស់ ដែលមានស្មារតីស្រឡាញ់ជាតិ ដោយបានចូលរួមឧបត្ថម្ភគ្រឿងឧបភោគបរិភោគ និងថវិកា ដើម្បីគាំទ្រដល់សមរភូមិជួរមុខ គ្រួសារទ័ព និងប្រជាជនដែលបានជម្លៀសពីតំបន់សមរភូមិចូលមកភូមិសាស្ត្រខេត្តសៀមរាប ក្នុងស្មារតីខ្មែរជួយខ្មែរក្នុងគ្រាលំបាក។
ក្នុងឱកាសនោះដែរ ឯកឧត្តមអភិបាលខេត្ត ក៏បានអំពាវនាវដល់ ឯកឧត្តម លោកជំទាវ អ្នកឧកញ៉ា លោកលោកស្រី ម្ចាស់ក្រុមហ៊ុន សហគ្រាស ពាណិជ្ជករ អាជីវករ និងបងប្អូនប្រជាពលរដ្ឋដែលនៅតាមបណ្តាក្រុងស្រុក សូមបន្តចូលរួមបន្តឧបត្ថម្ភគាំទ្រនូវគ្រឿងឧបភោគបរិភោគ និងសម្ភារប្រើប្រាស់បន្ថែមទៀត នៅតាមបណ្ដាក្រុងស្រុកបងប្អូនផ្ទាល់ ឬតាមរយៈរដ្ឋបាលខេត្តសៀមរាប ក្នុងន័យរួមតែមួយ គឺខ្មែរជួយខ្មែរ។
ឯកឧត្តម អែល សៀត តំណាងបងប្អូនខ្មែរឥស្លាមខេត្តសៀមរាប បានថ្លែងថាដោយមានស្មារតីស្រលាញ់ជាតិ និងដើម្បីរួមចំណែកការពារជាតិមាតុភូមិ ក្នុងនាមជាតិខ្មែរតែមួយ ដូច្នេះហើយថ្នាក់ដឹកនាំសាសនាឥស្លាមខេត្តសៀមរាប ក៏បានកៀរកូរបងប្អូនប្រជាពលរដ្ឋខ្មែរឥស្លាម បាននាំគ្នាចូលរួមបរិច្ចាគគ្រឿងឧបភោគបរិភោគ រួមនិងថវិកា ដើម្បីយកទៅជូនដល់រដ្ឋបាលខេត្ត យកទៅជួយឧបត្ថម្ភបន្តដល់បងប្អូនវីរៈកងទ័ពខ្មែរយើងដែលនៅសមរភូមិជួរមុខដែលកំពុងការពារបូរណភាពទឹកដី ពីការឈ្លានពានពីសំណាក់សៀម និងជួយបន្តដល់បងប្អូនប្រជាជនដែលបានជម្លៀសពីតំបន់សមរភូមិចូលមកភូមិសាស្ត្រខេត្តសៀមរាបផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
