ក្នុងឱកាសចុះពិនិត្យទីតាំងសុវត្ថិភាព និងចែកអំណោយជូនបងប្អូនជាជនភៀសសឹក ក្នុងសង្កាត់គោកចក ក្រុងសៀមរាប នៅថ្ងៃទី២៩ ខែកក្កដា ឆ្នាំ២០២៥ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប បានណែនាំដល់អាជ្ញាធរមូលដ្ឋាន ត្រូវបន្តយកចិត្តទុកដាក់ខ្ពស់ចំពោះបញ្ហាសុខភាពបងប្អូនជាជនភៀសសឹក ដោយត្រូវត្រៀមនូវថ្នាំសង្កូវ ត្រៀមសង្គ្រោះបឋមគ្រប់ពេលវេលា ពិសេសពេលយប់ព្រលប់ ហើយត្រូវរក្សាឱ្យបានអំពីសុខសុវត្ថិភាពរបស់ពួកគាត់។
ឯកឧត្តម លី សំរិទ្ធ ក៏បានជំរុញឱ្យអាជ្ញាធរ ត្រូវផ្គត់ផ្គង់អាហារ និងសម្ភារប្រើប្រាស់ឱ្យគ្រប់គ្រាន់ ជៀសវាងការខ្វះខាតដោយប្រការណាមួយ ហើយប្រសិនបើមានការខ្វះខាតសូមស្នើបន្ទាន់ទៅរដ្ឋបាលខេត្ត ដើម្បីផ្គត់ផ្គង់បន្ថែម។
ឯកឧត្តម ក៏សូមថ្លែងអំណរគុណចំពោះបងប្អូនសប្បុរសជន ដែលមានចិត្តសប្បុរសក្នុងស្មារតីខ្មែរជួយខ្មែរ ដោយចូលរួមឧបត្ថម្ភគាំទ្រនូវធនធានផ្ទាល់ខ្លួន ដល់បងប្អូនប្រជាពលរដ្ឋយើងដែលបានជម្លៀសខ្លួនរកទីតាំងសុវត្ថិភាព មកកាន់ខេត្តសៀមរាប។ ឯកឧត្តម ក៏សូមអំពាវនាវដល់សប្បុរសជន បន្តចូលរួមឧបត្ថម្ភគាំទ្រនូវគ្រឿងឧបភោគបរិភោគ និងសម្ភារប្រើប្រាស់បន្ថែមទៀត តាមរយៈរដ្ឋបាលក្រុងស្រុកផ្ទាល់ ឬតាមរយៈរដ្ឋបាលខេត្តសៀមរាប៕
ប្រភព៖ រដ្ឋបាលខេត្តសៀមរាប
