នៅព្រឹកថ្ងៃទី៣០ ខែកក្កដា ឆ្នាំ២០២៥នេះ បងប្អូនជនភៀសសឹកចំនួន៧២គ្រួសារ ដែលកំពុងស្នាក់នៅទីតាំងសុវត្ថិភាពក្នុងវត្តប្រាសាទគោចក និងវត្តទេពពោធិវង្ស នៃសង្កាត់គោកចក បានទទួលអំណោយជាគ្រឿងឧបភោគបរិភោគ និងសម្លៀកបំពាក់ពីសប្បុរសជនរស់នៅសង្កាត់ចុងឃ្នៀស និងសង្កាត់សៀមរាប តាមរយៈរដ្ឋបាលក្រុងសៀមរាប។
លោក ហាយ យ៉ង អភិបាលរងក្រុងសៀមរាប បានថ្លែងអំណរគុណ ចំពោះទឹកចិត្តរបស់សប្បុរសជន ដែលបានរួមចំណែកជាធនធានផ្ទាល់ខ្លួន ដើម្បីផ្ដល់គ្រឿងឧបភោគបរិភោគ និងសម្លៀកបំពាក់ ចែកជូនដល់បងប្អូនជនភៀសសឹក ដែលជម្លៀសពីតំបន់រងគ្រោះដោយការឈ្លានពានរបស់កងទ័ពថៃ។ ការផ្ដល់អំណោយទាំងនេះ ជាសារបង្ហាញពីសាមគ្គីភាព ខ្មែរស្រឡាញ់ខ្មែរ ឯកភាពជាតិខ្មែរជាធ្លុងមួយ ក្រោមការដឹកនាំរបស់រាជរដ្ឋាភិបាល ជាពិសេសឆ្លុះបញ្ចាំងថា ប្រជាពលរដ្ឋជាសមរភូមិក្រោយ នៅតែគាំទ្រជានិច្ចចំពោះកងទ័ព និងជនភៀសសឹក។
លោកអភិបាលរងក្រុង ក៏បានណែនាំដល់បងប្អូនជនភៀសសឹកទាំងអស់ ត្រូវថែទាំសុខភាពឱ្យបានល្អ ក្នុងករណីមានបញ្ហាឈឺស្កាត់ ឬត្រូវការសេវាពិនិត្យសុខភាព អាចទាក់ទងក្រុមការងារប្រចាំការ ឬអាជ្ញាធរមូលដ្ឋានដែលក្បែរបំផុត។
ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក មានថេរដីការថា ការភៀសខ្លួនចោលផ្ទះសម្បែង ស្រែចម្ការ គឺពិតជាលំបាកខ្វះខាត និងពុំមានសម្ភារផ្ទះបាយគ្រប់គ្រាន់ឡើយ ហេតុនេះវត្តបានចាត់ចុងភៅដាំស្លផ្ដល់អាហារបីពេល ដល់ពួកគាត់ទៅតាមលទ្ធភាពដែលវត្តអាចធ្វើបាន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
