នៅថ្ងៃទី៥ ខែសីហា ឆ្នាំ២០២៥ បងប្អូនជាជនភៀសសឹកចំនួន ៥០គ្រួសារ ដែលកំពុងស្នាក់នៅក្នុងវត្តប្រាសាទត្រាំនាគ ក្រុងសៀមរាប បានទទួលអំណោយជាគ្រឿងឧបភោគបរិភោគ និងសម្ភារប្រើប្រាស់ប្រចាំថ្ងៃពីរដ្ឋបាលខេត្តសៀមរាប និងសប្បុរសជន។
លោក ង៉ូវ សេងកាក់ អភិបាលរងខេត្តសៀមរាប បានថ្លែងអំណរគុណ ចំពោះទឹកចិត្តរបស់សប្បុរសជន ដែលបានរួមចំណែកជាធនធានផ្ទាល់ខ្លួន ដើម្បីផ្ដល់គ្រឿងឧបភោគបរិភោគ និងសម្ភារប្រើប្រាស់ ចែកជូនដល់បងប្អូនជនភៀសសឹក ដែលជម្លៀសពីតំបន់រងគ្រោះដោយការឈ្លានពានរបស់កងទ័ពថៃ និងកំពុងស្នាក់នៅទីតាំងសុវត្ថិភាពនានាទូទាំងខេត្តសៀមរាប។
លោក ង៉ូវ សេងកាក់ មានប្រសាសន៍ថា ការផ្ដល់អំណោយទាំងនេះ ជាសារបង្ហាញពីសាមគ្គីភាព ខ្មែរស្រឡាញ់ខ្មែរ ឯកភាពជាតិខ្មែរជាធ្លុងមួយ ក្រោមការដឹកនាំរបស់រាជរដ្ឋាភិបាល ដែលមាន សម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត ជាមេដឹកនាំដ៏អស្ចារ្យសម្រាប់កម្ពុជា។ ហើយចំពោះការនាំយកអំណោយមកផ្ដល់ជូននេះ ក៏ជាពិសេសឆ្លុះបញ្ចាំងថា ប្រជាពលរដ្ឋជាសមរភូមិក្រោយ នៅតែគាំទ្រជានិច្ចចំពោះកងទ័ព និងជនភៀសសឹក។
ព័ត៌មានជាតិ ថ្មីៗ
លោកអភិបាលរងខេត្ត ក៏បានណែនាំដល់បងប្អូនជនភៀសសឹកទាំងអស់ ត្រូវថែទាំសុខភាពឱ្យបានល្អ ក្នុងករណីមានបញ្ហាឈឺស្កាត់ ឬត្រូវការសេវាពិនិត្យសុខភាព អាចទាក់ទងក្រុមការងារប្រចាំការ ឬអាជ្ញាធរមូលដ្ឋានដែលក្បែរបំផុត។ ជាមួយគ្នានោះ លោកក៏បានជំរុញឱ្យអាជ្ញាធរ ត្រូវផ្គត់ផ្គង់អាហារ និងសម្ភារប្រើប្រាស់ឱ្យគ្រប់គ្រាន់ ជៀសវាងការខ្វះខាតដោយប្រការណាមួយ ហើយប្រសិនបើមានការខ្វះខាត សូមស្នើបន្ទាន់ទៅរដ្ឋបាលខេត្ត ដើម្បីផ្គត់ផ្គង់បន្ថែម៕
អត្ថបទ និងរូបភាព៖ លោក អ៊ុន ណារាជ្យ
