មជ្ឈមណ្ឌលអភិវឌ្ឍន៍ស្រ្តី គឺជាមជ្ឈមណ្ឌលបណ្ដុះបណ្ដាលជំនាញវិជ្ជាជីវៈដល់ស្រ្តី ដែលស្ថិតក្រោមការគ្រប់គ្រងរបស់មន្ទីរកិច្ចការនារីខេត្តសៀមរាប ហើយកំពុងដើរតួនាទីយ៉ាងសំខាន់ ក្នុងការជួយឱ្យស្ដ្រីអាចបានចូលរួមលើកស្ទួយសេដ្ឋកិច្ចគ្រួសារ តាមរយៈការបណ្ដុះបណ្ដាលជំនាញវិជ្ជាជីវៈដល់ពួកគាត់។
លោកស្រី ឈុន សោភ័ណ ប្រធានការិយាល័យអភិវឌ្ឍន៍សេដ្ឋកិច្ច នៃមន្ទីរកិច្ចការនារីខេត្តសៀមរាប បានឱ្យដឹងថា បច្ចុប្បន្នមជ្ឈមណ្ឌលអភិវឌ្ឍន៍ស្រ្តី កំពុងផ្ដល់នូវជំនាញចំនួន៣ធំៗដល់ស្ត្រី រួមមាន៖ ជំនាញកាត់ដេរសម្លៀកបំពាក់ តម្បាញ និងផ្នែកសំអាងកាយ ដែលក្នុងមួយវគ្គមានរយៈពេល៦ខែ ដែលការការសិក្សានេះ ស្ដ្រីមិនត្រឹមតែទទួលបាននូវជំនាញវិជ្ជាជីវៈមួយច្បាស់លាស់ប៉ុណ្ណោះទេ តែក៏ជាការចំណែកមួយជួយលើកស្ទួយសេដ្ឋកិច្ចក្នុងគ្រួសារផងដែរ។
លោកស្រីបន្ដថា កន្លងមកស្ត្រីទាំងអស់ តែងទទួលបានការលើកទឹកចិត្តពីសំណាក់ក្រុមគ្រួសារ ធ្វើឱ្យពួកគាត់មានឱកាសក្នុងការមករៀននូវជំនាញវិជ្ជាជីវៈ ដែលពួកគាត់ស្រឡាញ់ចូលចិត្ត ហេតុនេះហើយការបង្កលក្ខណៈងាយស្រួលដល់ស្ដ្រី បានមកទទួលយកនូវជំនាញនេះ ដោយគ្មានគំនាប និងក្ដីកង្វល់នានា។ ជាមួយគ្នានេះ ក្រោយពីសិក្ខាកាមដែលបានជោគជ័យក្នុងការសិក្សារួចហើយនោះ នឹងទទួលបានវិញ្ញាបនបត្រ ទទួលស្គាល់ពីមន្ទីរកិច្ចការនារីខេត្ត ក្នុងនោះមន្ទីរក៏បានចាត់ក្រុមការងារ ចុះតាមដាន សួរសុខទុក្ខសិក្ខាកាម អំពីលទ្ធផលរបស់ពួកគាត់ក្រោយរៀនវគ្គបណ្ដុះបណ្ដាលជំនាញវិជ្ជាជីវៈនេះថែមទៀតផង៕
អត្ថបទ និងរូបភាព៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
