ក្នុងពិធីចែកបណ្ណសរសើរដល់សិស្សពូកែមានស្នាដៃល្អប្រចាំឆ្នាំ របស់សាលាបឋមសិក្សាចុងឃ្នៀស ក្នុងសង្កាត់ចុងឃ្នៀស ក្រុងសៀមរាប នៅថ្ងៃទី១ ខែកញ្ញានេះ លោក ទុយ រ៉ន នាយកសាលា បានអំពាវនាវដល់មាតាបិតា អាណាព្យាបាលសិស្ស និងសប្បុរសជនទាំងអស់ បន្តជួយគាំទ្ររាល់សកម្មភាពនានាដែលសាលាបានអនុវត្ត ដើម្បីជំរុញឱ្យសាលាមានការរីកចម្រើន ជឿនលឿនទៅមុខ សាកសមជាសាលាកុមារមេត្រី និងស្តង់ដារសាលាគំរូ ស្របតាមគោលការណ៍ក្រសួងអប់រំ។
លោក ទុយ រ៉ន ក៏បានសំណូមពរដល់អាណាព្យាបាលសិស្សទាំងអស់ ជួយជំរុញកូនៗមករៀនសូត្រឱ្យបានទៀងទាត់ ជំរុញកូនឱ្យរៀនកម្មវិធីបឋមសិក្សា PLP និងបង្រៀនកូនបន្ថែមពេលនៅផ្ទះ ជាពិសេសត្រូវយកចិត្តទុកដាក់តាមដាន ឬពិនិត្យបន្ថែមចំពោះមេរៀនដែលលោកគ្រូអ្នកគ្រូដាក់ឱ្យកូនៗយកទៅធ្វើនៅផ្ទះ។ ចំពោះការចែកបណ្ណសរសើរនាពេលនេះដែរ គឺជាការបង្ហាញពីសមត្ថភាព ចំណេះដឹង ទេពកោសល្យ និងការតស៊ូក្នុងការសិក្សា ក្នុងការត្រៀមក្លាយជាធនធានមនុស្ស និងជួយអភិវឌ្ឍប្រទេសជាតិនាពេលខាងមុខ ព្រោះប្រទេសជាតិខ្លាំង គឺលុះត្រាតែធនធានមនុស្សរបស់យើងមានគុណភាពខ្ពស់។
លោក អ៊ុំ ណារី ចៅសង្កាត់ចុងឃ្នៀស លើកឡើងថា វិស័យអប់រំមានតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍជាតិ ដូចនេះកុមារ យុវជន និងមនុស្សពេញវ័យ ត្រូវទទួលបានការសិក្សា និងការអប់រំពេញមួយជីវិត ដើម្បីឆ្លើយតបទៅនឹងតម្រូវការទីផ្សារការងារប្រកបដោយគុណភាពខ្ពស់។ ក្នុងន័យនេះ លោកបានសំណូមពរឱ្យកូនៗ ក្មួយៗទាំងអស់ ត្រូវខិតខំយកចិត្តទុកដាក់រៀនសូត្រ បង្កើនការស្វ័យសិក្សាដោយខ្លួនឯង ចេះគោរពវិន័យ និងបទបញ្ជាផ្ទៃក្នុងសាលា មានសាមគ្គីភាពល្អរវាងមិត្តភក្តិ និងបងប្អូន ចេះជួយទុក្ខធុរៈគ្នាពេលមានអាសន្ន ត្រូវមានសុជីវធម៌ល្អ ចេះគោរពព្រឹទ្ធាចារ្យ ឪពុកម្តាយ លោកគ្រូអ្នកគ្រូ ចេះជួយការពារ និងថែរក្សាបរិស្ថានសាលារៀនគ្រប់ៗគ្នា ជៀសឱ្យឆ្ងាយពីគ្រឿងញៀន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
