កាលពីថ្ងៃទី៨ ខែកញ្ញា ឆ្នាំ២០២៥ ឯកឧត្តម ប្រាក់ សោភ័ណ អភិបាលខេត្តសៀមរាប បានទទួលអំណោយជាគ្រឿងឧបភោគ-បរិភោគ និងសម្ភារប្រើប្រាស់ពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងប្រតិភូក្រសួងមហាផ្ទៃ ប្រគល់ជូនរដ្ឋបាលខេត្ត និងស្នងការដ្ឋាននគរបាលខេត្តសៀមរាប សម្រាប់បន្តចែកជូនដល់សមរភូមិជួរមុខ និងប្រជាពលរដ្ឋជាជនភៀសសឹក ដែលស្នាក់នៅតាមមណ្ឌលសុវត្ថិភាពក្នុងខេត្តសៀមរាប។
ឯកឧត្តម ប្រាក់ សោភ័ណ ថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តដ៏ថ្លៃថ្លា របស់ឯកឧត្តមអភិសន្តិបណ្ឌិត ស សុខា និងប្រតិភូក្រសួងមហាផ្ទៃ និងបងប្អូនប្រជាពលរដ្ឋ ដែលជាសប្បុរសជនក្នុងខេត្ត និងក្រៅខេត្ត ដែលបានចូលរួមឧបត្ថម្ភគាំទ្រដល់សមរភូមិជួរមុខ គ្រួសារទ័ព និងប្រជាជនដែលបានជម្លៀសពីតំបន់សមរភូមិចូលមកភូមិសាស្ត្រខេត្តសៀមរាប ដោយទឹកចិត្តស្មោះសរក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាក។
សូមជម្រាបថា អំណោយដែលទទួលបានរួមមាន៖ អង្ករ ៥តោន , មី ២៥កេសធំ , ត្រីខ ២៥កេស , គុយទាវកញ្ចប់ ២៥កេស ,ទឹកសុទ្ធ ៥០កេស និងថ្នាំបាញ់មូស ១ ០០០ដប ដើម្បីយកទៅប្រើប្រាស់ក្នុងការផ្គត់ផ្គង់ដល់កងកម្លាំងនគរបាលការពារព្រំដែន និងប្រជាពលរដ្ឋជាជនភៀសសឹក បានកំពុងស្នាក់នៅតាមមណ្ឌលសុវត្ថិភាពក្នុងខេត្តសៀមរាប៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
