មន្ត្រីជាន់ខ្ពស់ក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា បញ្ហាប្រឈមនៃការកេងប្រវ័ញ្ច និងការរំលោភបំពានផ្លូវភេទលើកុមារតាមប្រព័ន្ធអនឡាញ គឺជាបញ្ហាសកលដែលតម្រូវឱ្យមានការឆ្លើយតបជាសកល និងស្របគ្នា ដោយគ្មានប្រទេសណាមួយអាចប្រយុទ្ធតែម្នាក់ឯងបានឡើយ។
ក្នុងសន្និសីទថ្នាក់តំបន់ស្ដីពី “ការពង្រឹងកិច្ចសហប្រតិបត្តិការ និងជំនាញក្នុងការប្រយុទ្ធប្រឆាំងនឹងការកេងប្រវ័ញ្ចផ្លូវភេទកុមារតាមប្រព័ន្ធអនឡាញ” នៅខេត្តសៀមរាប នាថ្ងៃទី១៨ ខែកញ្ញា ឆ្នាំ២០២៥ លោកជំទាវ ញ៉េប សុភាព រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា ការដោះស្រាយបញ្ហាដ៏ស្មុគស្មាញនេះ គឺទាមទារឲ្យមានការឆ្លើយតបជាបន្ទាន់ និងសម្របសម្រួលពីភាគីពាក់ព័ន្ធទាំងអស់។
លោកជំទាវបង្ហាញថា ដំណោះស្រាយសំខាន់ៗរួមមាន៖ ជំរុញដំណោះស្រាយបច្ចេកវិទ្យា តាមរយៈការការពារកុមារងាយរងគ្រោះតម្រូវឲ្យមានការវិនិយោគលើដំណោះស្រាយបច្ចេកវិទ្យាទំនើបៗ។ ពង្រឹងសមត្ថភាពអ្នកពាក់ព័ន្ធ ដោយយើងត្រូវបំពាក់ចំណេះដឹង និងជំនាញដល់មន្ត្រីអនុវត្តច្បាប់ ដើម្បីដោះស្រាយករណីស្មុគស្មាញទាំងនេះប្រកបដោយជំនាញ និងការយល់ចិត្ត។ ជាពិសេសការបណ្ដុះបណ្ដាលផ្អែកលើឧត្តមប្រយោជន៍កុមារ តាមរយៈកម្មវិធីបណ្ដុះបណ្ដាលដែលផ្ដោតលើជនរងគ្រោះ ព្រោះវាមានសារៈសំខាន់ណាស់ក្នុងការធានាថា ការឆ្លើយតបរបស់យើងមានប្រសិទ្ធភាព និងបង្ហាញពីការគាំទ្រដល់កុមាររងគ្រោះ។
លោកស្រី ម៉ននី រង្សី អភិបាលរងខេត្តសៀមរាប មានប្រសាសន៍ថា ការការពារកុមារ គឺជាតួនាទី និងកាតព្វកិច្ចខាងសីលធម៌ ក៏ដូចជាផ្លូវច្បាប់របស់មនុស្សពេញវ័យគ្រប់រូប។ កិច្ចការពារកុមារសំដៅលើរាល់សកម្មភាព និងវិធានការទាំងអស់ដើម្បីការពារកុមារពីអំពើហិង្សា ការរំលោភបំពាន ការកេងប្រវ័ញ្ច ការធ្វេសប្រហែស និងគ្រោះថ្នាក់គ្រប់ប្រភេទ។
លោកស្រីអភិបាលរងខេត្តបន្ថែមថា សន្និសីទនាពេលនេះដែរ មានគោលបំណងស្វែងរកដំណោះស្រាយករណីដ៏ស្មុគស្មាញនៃការកេងប្រវ័ញ្ច និងរំលោភបំពានផ្លូវភេទលើកុមារតាមប្រព័ន្ធអនឡាញ តាមរយៈការជំរុញកិច្ចសហប្រតិបត្តិការឆ្លងដែន និងការបង្កើតក្របខ័ណ្ឌសុខុមាលភាពដែលអាចទប់ស្កាត់ការរំលោភបំពានក្នុងពេលអនាគត។ សន្និសីទនេះ បានផ្ដល់នូវវេទិកាដ៏សំខាន់សម្រាប់ការពង្រឹងកិច្ចសហប្រតិបត្តិការក្នុងតំបន់ និងការបង្កើតយុទ្ធសាស្ត្រដែលអាចអនុវត្តបាន ដើម្បីបង្កើតបរិយាកាសឌីជីថលដែលមានសុវត្ថិភាពជាងមុនសម្រាប់កុមារ៕
អត្ថបទ និងរូបភាព៖ លោក មន្ត្រីមន្ទីរ
កែសម្រួល៖ លោក អ៊ុន ណារាជ្យ
