នាយកដ្ឋានឧតុនិយមថៃបាននិយាយពីថ្ងៃចន្ទម្សិលមិញនេះថា គេបានប៉ាន់ស្មានខ្ពស់ថា នឹងមានភ្លៀងខ្លាំងចាប់ពីថ្ងៃអង្គារ៍នេះ នៅក្នុងផ្នែកភាគខាងជើង និងភាគឦសាននៃប្រទេសថៃ ដោយសារការបង្កើតឡើងនូវប្រព័ន្ធសម្ពាធទាបមួយដែលអាចធ្វើបង្កឱ្យខ្យល់រដូវកាន់តែខ្លាំងនៅភាគនិរតី ។
នាយកដ្ឋាននេះបាននិយាយនៅក្នុងសេចក្តីថ្លែងការណ៍មួយថា ពេលដើមខែកក្កដានេះ នឹងឃើញមានភ្លៀងដែលកើនឡើងនៅក្នុងតំបន់ភាគខាងជើង និងភាគឦសាន ព្រមទាំងរលកខ្ពស់នៅក្នុងឈូង សមុទ្រថៃ និងសមុទ្រអង់ដាម៉ង់ ។
តែយ៉ាងណាក៏ដោយសេចក្តីថ្លែងការណ៍នោះបាននិយាយថា តំបន់ភាគកណ្តាល ភាគខាងកើត និង ភាគខាងត្បូង នឹងមានភ្លៀងច្រើន ប៉ុន្តែមិនច្រើនដូចនៅក្នុងតំបន់ភាគខាងជើង និងភាគឦសានទេ ។
អគ្គនាយក នៃអគ្គនាយកដ្ឋានឧតុនិយម លោក ភូវាង ប្រាខាមមីនថារ៉ា (Phuwieng Prakhammintara) ក៏បានព្រមានអ្នករស់នៅក្រុងបាងកក ផងដែរ ពីភ្លៀងខ្លាំងដែលអាចនាំទៅរកទឹកជំនន់ធ្ងន់ធ្ងរនៅក្នុងទីក្រុងរាជធានីនេះ ។
សេចក្តីថ្លែងការណ៍នោះបាននិយាយថា ក្រុងបាងកកនឹងមានភ្លៀងកើនឡើង ដែលប៉ះពាល់ដល់តំបន់នេះពី ៤០ ទៅ៦០ភាគរយ ជាពិសេសនៅពេលរសៀល និងនៅពេលយប់ ។ សមុទ្រអង់ដាម៉ង់ នឹងមានកម្ពស់រលកទឹកសមុទ្រ ចាប់ពី ២ទៅ៣ម៉ែត្រ ដោយឡែកនៅក្នុងឈូងសមុទ្រថៃ – នៅឯនាយឆ្នេរសមុទ្ររ៉ាយ៉ង, ចាន់ថាបូរី និង ត្រាត គេរំពឹងថា រលក នឹងមានកម្ពស់២ម៉ែត្រ ។
លោក ភូវាង បាននិយាយថា ជាទូទៅសីតុណ្ហភាពជាមធ្យមនៅក្នុងរយៈពេលនេះនឹងមាន ៣៣ ដឺក្រេសែលស៊ូស ដោយសីតុណ្ហភាពជាមធ្យមនៅក្រុងបាងកក គេរំពឹងថា នឹងមាន ៣៧ ដឺក្រេសែលស៊ូស ដោយឡែកផ្នែកដទៃទៀត នៃតំបន់ភាគកណ្តាលនឹងមានពី ៣២ ទៅ ៣៦ ដឺក្រេ ដែលស៊ូស ៕
( ប្រភព ស៊ីនហួ បកប្រែដោយលោក ប៉ិនមឿន )
