ថ្លែងនៅក្នុងពិធីអបអរសាទរ បុណ្យរុក្ខទិវាជាតិឆ្នាំ២០១៩ ( ៩ កក្កដា ) ដែលខេត្តសៀមរាប បានប្រារព្ធឡើងនៅភូមិក្រពើ ឃុំបល្ល័ង្គ ស្រុកប្រាសាទបាគង នាព្រឹកថ្ងៃទី០៣ ខែកក្កដានេះ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប បានអំពាវនាវដល់ប្រជាពលរដ្ឋ និងបណ្តាឈ្មួញគ្រប់រូប ដែលកំពុងបន្តកាប់បំផ្លាញព្រៃឈើចាប់យកដីព្រៃ និងកំពុងបន្តធ្វើអាជីវកម្មព្រៃឈើ ធ្វើជំនួញដីព្រៃឈើខុសច្បាប់ សូមបញ្ឈប់សកម្មភាពទាំងនោះជាបន្ទាន់ ព្រោះវាគឺជាបទល្មើសដ៏ធ្ងន់ធ្ងរបំផុត ជាពិសេស វាជាហេតុនៃការបង្កគ្រោះមហន្តរាយដល់បរិស្ថានធម្មជាតិ ដែលមិនអាចអត់ឱនឱ្យបាន ។
ឯកឧត្តម អ៊ឹង ហឿន មានប្រសាសន៍បន្តថា ការប្រារព្ធពិធីនេះ គឺជាការឆ្លុះបញ្ចាំងឱ្យឃើញ អំពីការខិតខំប្រឹងប្រែងយ៉ាងសកម្ម របស់រាជរដ្ឋាភិបាល ក្នុងការគ្រប់គ្រង-អភិរក្សធនធានព្រៃឈើ ដែលជាគោលដៅអាទិភាពខ្ពស់ និងចក្ខុវិស័យវែងឆ្ងាយ ប្រកបដោយនិរន្តរភាព។ ការអភិរក្ស និងការគ្រប់គ្រងធនធានធម្មជាតិ ជីវចំរុះ និងប្រព័ន្ធអេកូឡូស៊ីប្រកបដោយប្រសិទ្ធភាព ពិតជាបានរួមចំណែកក្នុងការកាត់បន្ថយភាពក្រីក្ររបស់ប្រជាជន និងការអភិវឌ្ឍន៍សេដ្ឋកិច្ចសង្គម ឱ្យបានប្រសើរឡើង។ ធនធានធម្មជាតិ គឺជាប្រភពធនធានមួយដ៏រស់រវើក និងមិនចេះរីងស្ងួត ប្រសិនបើយើងទាំងអស់គ្នាចេះគ្រប់គ្រង ការពារ និងអភិរក្ស ឱ្យបានសមស្រប ។ ធម្មជាតិទាំងឡាយអាចរស់នៅលើភពផែនដីយើងនេះបាន ដោយមិនចាំបាច់មានមនុស្ស តែមនុស្សសត្វទាំងឡាយ មិនអាចរស់នៅដោយខ្វះធម្មជាតិនោះទេ ។
ឯកឧត្តម អ៊ឹង ហឿន មានប្រសាសន៍បន្ថែមថា កន្លងមកខណ្ឌរដ្ឋបាលព្រៃឈើសៀមរាប បានកំពុងថែរក្សាការពារយ៉ាងសកម្មនូវចម្ការពូជក្រញូងព្រៃធម្មជាតិផ្ទៃដីទំហំ ១.៨៨៨ ហិកតា ដែលមានដើមមេពូជប្រមាណជាង៥០០ដើម ស្ថិតក្នុងឃុំកន្ទួត ស្រុកស្វាយលើ និងឃុំឃុនរាម ស្រុកបន្ទាយស្រី ។ ហើយឯកឧត្តមសង្ឃឹមថា ដើមក្រញូងមេពូជជាង៥០០ដើមនេះ និងអាចផ្ដល់គ្រាប់ បន្តពូជគ្រញូងឱ្យមានឡើងវិញនៅកម្ពុជា ។
ពិធីអបអរ បុណ្យរុក្ខទិជាជាតិ ដែលបានប្រារព្ធនៅខេត្តសៀមរាបនៅឆ្នាំនេះ ត្រូវបាននាំយកកូនឈើចម្រុះ រួមមានប្រភេទកូនដើមឈើធ្នង់ បេង គគី និងឈើទាល ប្រមាណជាង៣ពាន់ដើម ដាំឈើផ្ទឺដីទំហំ ៣ ហិចតា នេះបើតាមសេចក្តីរាយការណ៍របស់ លោក ម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប ។
សូមបញ្ជាក់ថា ខណ្ឌរដ្ខបាលព្រៃឈើសៀមរាប មានថ្នាលបណ្តុះកូនឈើសរុបចំនួន ១៧ ថ្នាល នៅតាមបណ្តាស្រុកនៃខេត្តសៀមរាប និងមានសមត្ថភាពផលិតកូនឈើប្រមាណ ៥០ម៉ឺនដើម ក្នុងមួយឆ្នាំ ។ កូនឈើបណ្ដុះរួមមាន ឈើសំរាប់ដាំរយៈពេលវែង រយៈពេលខ្លី និងឈើហូបផ្លែ ដើម្បីស្ដារគំរបបៃតងឡើងវិញ ។ ជារៀងរាល់ឆ្នាំ កូនឈើ ត្រូវបានចែកចាយជូនប្រជាពលរដ្ឋដាំ តាមសាលារៀន វត្តអារ៉ាម លំនៅស្ថាន មនី្ទរ-អង្គភាពនានា និងដាំតាមដងផ្លូវសាធារណៈ ដាំជាចំការ ដាំតាមស្ថានីយស្តារនិងស្រាវជ្រាវព្រៃឈើ ៕
អត្ថបទ និង រូបភាព ៖ ងិន គីមឡេង , យូ វង្ស , ម៉ី សុខារិទ្ធ , ស៊ាន សុផាត
កែសម្រួល ៖ អ៊ុន ណារាជ្យ
