ប្រទេសសមាជិកអាស៊ានទាំង១០ និង ដៃគូពាក់ព័ន្ធ មានក្តីក្តីកង្វល់លើការចរាចរឱសថក្លែងក្លាយនិងអន់គុណភាព តាមរយៈការលក់និងចែកចាយគ្មានប្រភពច្បាស់លាស់ ព្រមទាំងការលក់ឱសថតាមប្រព័ន្ធអនឡាញផងដែរ ដែលបណ្តាលឲ្យប៉ះពាល់ដល់សុខភាពប្រជាពលរដ្ឋក្នុងតំបន់អាស៊ាន ប៉ះពាល់ដល់សេដ្ឋកិច្ចជាតិ និង សេដ្ឋកិច្ចក្នុងតំបន់ ។ បញ្ហាទាំងនេះ គឺជាបន្ទុកដ៏ធ្ងន់ធ្ងរ សម្រាប់សណ្តាប្រទេសជាសមាជិកអាស៊ាន ដែលត្រូវរិះរកវិធានការរួមគ្នា ក្នុងការដោះស្រាយបញ្ហាដ៏ស្មុគ្រស្មាញ នេះបើតាមរបាយការណ៍នៃកិច្ចប្រជុំពិគ្រោះយោបល់ ស្តីពីការពង្រឹងកិច្ចសហការក្នុងតំបន់ សម្រាប់ការងារប្រយុទ្ធ -ប្រឆាំង ឱសថក្លែងក្លាយនិងអន់គុណភាព រសៀលថ្ងៃទី០២ ខែកក្កដា ឆ្នាំ២០១៩ ។
លោកជំទាវ វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ថ្លែងក្នុងឱកាសបិទកិច្ចប្រជុំនោះថា កិច្ចប្រជុំនេះមានសារសំខាន់ណាស់ ក្នុងការលើកកម្ពស់ប្រសិទ្ធភាព និង បង្កើនកិច្ចសហប្រតិបត្តិការនៃបណ្តាប្រទេសជាសមាជិកអាស៊ានទាំងអស់ដើម្បីប្រយុទ្ធ-ប្រឆាំងឱសថក្លែងក្លាយនិងអន់គុណភាពនៅក្នុងតំបន់ ។ សេចក្តីព្រាងចំណុចគន្លឹះសំខាន់ៗពាក់ព័ន្ធនឹងបញ្ហានេះ បានបញ្ជាក់អំពីការប្តេជ្ញាចិត្តរួមគ្នា ក្នុងការបង្កើនសកម្មភាពប្រយុទ្ធ-ប្រឆាំងទៅនឹងការគំរាមកំហែងសុខភាពសាធារណៈ ដែលមានលក្ខណៈជាសាកលនេះ ។
លោកជំទាវ វេជ្ជបណ្ឌិត ឱ វណ្ណឌីន បន្តថា លទ្ធផលនៃកិច្ចប្រជុំនេះ បានកំណត់ និងបង្ហាញអំពីបញ្ហាប្រឈមនានាពាក់ព័ន្ធនឹងកម្រឹតនៃការអនុវត្តច្បាប់ និងការអនុវត្តយុទ្ធសាស្ត្ររបស់អង្គការសុខភាពពិភពលោក ដើម្បីទប់ស្កាត់ការធ្វើចរាចរ ការស្រាវជ្រាវ និង ការឆ្លើយតបក្នុងការប្រយុទ្ធប្រឆាំងឱសថក្លែងក្លាយនិងអន់គុណភាព ដែលកើតមានឡើងនៅក្នុងបណ្តាប្រទេសជាសមាជិកអាស៊ាន ។ កិច្ចប្រជុំនេះ ក៏បានរៀបចំផែនការសកម្មភាពរួមគ្នា ដែលនឹងត្រូវស្នើឲ្យមានការគាំទ្រដោយរដ្ឋមន្ត្រីក្រសួងសុខាភិបាលបណ្តាប្រទេសអាស៊ាន ជាមួយនឹងការឯកភាពគ្នា កំណត់លើចំណុចគន្លឹះពាក់ព័ន្ធទៅនឹងការប្រយុទ្ធ-ប្រឆាំងឱសថក្លែងក្លាយនិងអន់គុណភាព ដែលត្រូវដាក់បញ្ចូលទៅក្នុងសេចក្តីថ្លែងការរួមគ្នាសម្រាប់ការនុម័ត នៅក្នុងកិច្ចប្រជុំរដ្ឋមន្ត្រីសុខាភិបាលអាស៊ាន លើកទី១៤ នៅក្នុងខែសីហា ឆ្នាំ២០១៩ ខាងមុខ ។
គួរបញ្ជាក់ដែរថា កិច្ចប្រជុំពិគ្រោះយោបល់ ស្តីពីការពង្រឹងកិច្ចសហការក្នុងតំបន់ សម្រាប់ការងារ ប្រយុទ្ធប្រឆាំងឱសថក្លែងក្លាយ និង អន់គុណភាព ដែលកិច្ចប្រជុំនេះ ប្រព្រឹត្តិទៅនៅក្រុងសៀមរាបរយៈពេល២ថ្ងៃ ហើយបានបិទបញ្ចប់ប្រកបដោយផ្លែផ្កា នារសៀលថ្ងៃទី០២ ខែកក្កដា ឆ្នាំ២០១៩ ។
អត្ថបទ និង រូបភាព ៖ងិន គីមឡេង
កែសម្រួល ៖ អ៊ុន ណារាជ្យ
