មន្ត្រីនគរបាលជំនាញ បង្ការពន្លត់អគ្គីភ័យ និងសង្រ្គោះ នៃស្នងការដ្ឋាននគរបាលខេត្តសៀមរាប ធ្វើការពង្រឹងសមត្ថភាពបន្ថែម អន្តរាគមន៍ពន្លត់អគ្គីភ័យ ក៏ដូចជាពញាក់ស្មាតីដល់ប្រជាពលរដ្ឋ ក្នុងខេត្តសៀមរាប មានការប្រុងប្រយ័ត្នខ្ពស់។
កាលពីរសៀលថ្ងៃទី ២៣ ខែ សីហាឆ្នាំ២០១៨ លោកឧត្តមសេនីយ៍ត្រី ភឹង សម្បត្តិ បានមានប្រសាសន៍ថា ដោយបានការអនុញ្ញាតរបស់លោកឧត្តមសេនីយ៍ត្រី ទិត្យ ណារ៉ុង ស្នងការនគរបាលខេត្តសៀមរាប ដើមី្បហ្វឹកហ្វឺន និងពង្រឹងសមត្ថភាពដល់មន្ត្រីនគរបាល ពន្លត់អគ្គីភ័យក្រុង ស្រុក ក្នុងខេត្ត ក្នុងការជួយសង្រ្គោះដល់ជនរងគ្រោះ ដើមី្បធានានូវគុណភាព នៃគ្រឿងយន្ត។
ឆ្លងតាមការបង្ហាត់បង្ហាញរបស់លោកវរសេនីយ៍ត្រី សេន សុវណ្ណនី ប្រធានការិយាល័យបង្កា ពន្លត់អគ្គីភ័យ និង សង្រ្គោះ ក្រុមសិក្ខាកាមទទួលបាន បច្ចេកទេស និងវិធីសាស្ត្រ លើការពន្លត់អគ្គីភ័យ រួមមាន បច្ចេកទេសទាញយកឧបករណ៍ សម្ភារៈប្រើប្រាស់ក្នុងការបាញ់ទឹក និងការកាន់ពុយយោបាញ់ទឹក ដើមី្បធានាក្នុងការពន្លត់ឲ្យចំគោលដៅ ព្រមទាំងធានាបានសុវត្ថិភាពដល់កម្លាំងពន្លត់អគ្គីភ័យ និងអ្នករងគ្រោះ ។
ព័ត៌មានជាតិ ថ្មីៗ
លោកឧត្តមសេនីយ៍ត្រី ភឹង សម្បត្តិ បានផ្តាំផ្ញើដល់ប្រជាពលរដ្ឋ ក្រុមហ៊ុន ម្ចាស់ហាង និងស្ថាប័នផ្សេងៗ ត្រូវប្រុងប្រយ័ត្នចំពោះឧបករណ៍ប្រើប្រាស់ ដូចជា ចរន្តអគ្គិសនី ភ្លើងទៀន ភ្លើងធូប ចង្ក្រាន ធុងហ្គាស និង ការដុះសម្រាម ដើម្បីបង្ការហានិភ័យភ្លាមៗជាយថាហេតុ គួរមានបំពង់ពន្លត់អគ្គិភ័យនៅតាមទីតាំងរបស់ខ្លួន។
សូមបញ្ជាក់ថា កាលពីថ្ងៃទី២២ ខែសីហា ឆ្នាំ២០១៨ ស្នងការដ្ឋាននគរបាលខេត្តសៀមរាប បានទទួលរថយន្តពន្លត់អគ្គិភ័យចំនួន ០៥គ្រឿងបន្ថែមទៀត ពីក្រសួងក្រសួងមហាផ្ទៃ ដើម្បីបង្កើនសមត្ថភាព និងធ្វើទំនើបកម្ម ក្នុងការបង្ការពន្លត់អគ្គីភ័យ និងសង្រ្គោះ ក្នុងខេត្តទេសចរណ៍ដ៏មានប្រជាប្រិយមួយនេះ៕
អត្ថបទ និង រូបថត ៖ លោក ថាច់ ពិសុទ្ធ និង លោក គឿន វេត
កែសម្រួលអត្ថបទ ៖ លោក សេង ផល្លី
