នៅក្នុងខែសីហា ឆ្នាំ២០១៨នេះ កម្លាំងនគរបាលចរាចរណ៍ផ្លូវគោកខេត្តសៀមរាប បានឃាត់ម៉ូតូកែច្នៃខុសលក្ខណៈបច្ចេកទេសបានចំនួន ១៦៥គ្រឿង និងឲ្យម្ចាស់ម៉ូតូធ្វើកិច្ចសន្យាបញ្ឈប់ការកែច្នៃបន្តទៅទៀត។
បន្ទាប់ពីច្បាប់ចរាចរណ៍ផ្លូវគោកចូលជាធរមាន និងដាក់ឱ្យអនុវត្ត រហូតមកទល់ពេលនេះសមត្ថកិច្ចចរាចរណ៍ផ្លូវគោកខេត្តសៀមរាប នៅតែបន្តពិនិត្យឃើញថា គឺមានប្រជាពលរដ្ឋមួយចំនួននៅមិនទាន់បានអនុវត្តឱ្យបានខ្ជាប់ខ្ជួននៅឡើយទេ ចំពោះការធ្វើការចរាចរណ៍នៅតាមដងផ្លូវ ហើយអ្នកប្រើប្រាស់ទោចក្រក្រយានយន្ដមួយចំនួន មិនបានពាក់មួកសុវត្ថិភាព និងដាក់កញ្ចក់នៅឡើយ លើសពីទាំងអ្នកបើកបរដោយប្រើប្រាស់ម៉ូតូ ដែលមានការកែច្នៃបំពង់ស៊ីម៉ាំងឮសំឡេងខ្លាំង និងបំពាក់ភ្លើងឡាស៊ែជាដើម ដែលខុសលក្ខណៈបច្ចេកទេស និងច្បាប់ហាមឃាត់។
ដោយមើលឃើញ ពីការរីករាលដាលនៃការកែច្នៃម៉ូតូ ខុសបច្ចេកទេស ដែលបានបង្កផលប៉ះពាល់ដល់ការធ្វើចរាចរណ៍ និងបរិស្ថាននៅខេត្តសៀមរាប លោកវរសេនីយឯក ជឹម សុវណ្ណ នាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានបញ្ជាក់ប្រាប់ឲ្យទូរទស្សន៍ជាតិខេត្តសៀមរាបដឹងថា យោងតាមស្មារតីអង្គប្រជុំរបស់ស្នងការដ្ឋាននគរបាលខេត្តសៀមរាប ដឹកនាំដោយលោកឧត្តមសេនីយទោ ទិត្យ ណារ៉ុង ស្នងការនគរបាលខេត្ត បានដាក់ចេញនូវផែនការ បទបញ្ជា ចំពោះការិយាល័យនគរបាលចរាចរណ៍ផ្លូវគោក ដើម្បីបង្ការ ទប់ស្កាត់ និងអប់រំ ចំពោះអ្នកបើកបរមិនគោរពច្បាប់ចរាចរផ្លូវគោក ជាលទ្ធផល នៃការអនុវត្តផែនការ និងបទបញ្ជាខាងលើ ក្នុងខែសីហានេះ ការិយាល័យនគរបាលចរាចរណ៍ បានឃាត់ម៉ូតូខុសលក្ខណៈបច្ចេកទេសបានចំនួន ១៦៥គ្រឿង ហើយបានយកទៅរក្សាទុកក្នុងរយៈពេលមួយថ្ងៃ និងមួយយប់ ទើបប្រគល់ឱ្យម្ចាស់ដើមវិញ ដោយបានឲ្យម្ចាស់ម៉ូតូធ្វើកិច្ចសន្យា និងកែច្នៃម៉ូតូឲ្យដូចសភាពដើមវិញ ចំពោះសម្ភារៈខុសលក្ខណៈបច្ចេកទេសដែលដោះចេញរួចរាល់ ត្រូវយកមករក្សាទុកនៅទីស្នាក់ការនគរបាលចរាចរណ៍ផ្លូវគោក ដោយមិនប្រគល់ឱ្យម្ចាស់វិញឡើយ។
លោកវរសេនីយឯក ជឹម សុវណ្ណ បានបន្ថែមថា ក្នុងរយៈពេលកន្លងទៅនេះ ការិយាល័យនគរបាលចរាចរណ៍ រួមនិងមន្ទីរ ស្ថាប័ន អង្គភាព និងដៃគូពាក់ព័ន្ធ បានធ្វើការចែកនូវឯកសារផ្សព្វផ្សាយអប់រំ ស្តីពីច្បាប់ចរាចរណ៍ផ្លូវគោក និងករណីដែលបង្កឡើងដោយគ្រោះថ្នាក់ចរាចរណ៍ ក្នុងការបង្ហាញពីភាពធ្វេសប្រហែស ការបើកបរក្រោមឥទ្ធិពលជាតិស្រវឹង ភាពងងុយដេក និងកត្តាយានយន្តជូនដល់សាធារណជន និងអ្នកដែលប្រើប្រាស់ផ្លូវ/ថ្នល់ផងដែរ។
លោកបានសំណូមពរដល់អ្នកធ្វើចរាចរណ៍តាមដងផ្លូវទាំងអស់ ដែលប្រើប្រាស់ទោចក្រយានយន្ត ត្រូវប្រកាន់ខ្ជាប់នូវច្បាប់ចរាចរណ៍ និងលក្ខណៈបច្ចេកទេសរបស់យានជំនិះ ដោយក្នុងនោះ ត្រូវតែពាក់ពួកសុវត្ថិភាពជានិច្ចនូវពេលបើកបរ ទោះក្នុងលក្ខណៈនៃការធ្វើដំណើទៅកាន់គោលដៅនីមួយទោះជិត ឬឆ្ងាយ និងចេះអធ្យាស្រ័យគ្នាទៅវិញទៅមកនៅពេលបើកបរ ដើម្បីសុវត្ថិភាពរបស់បងប្អូន៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
