ដើម្បីកំណត់គោលដៅនៃការរៀនសូត្រដើម្បីអនាគត ការត្រៀមខ្លួនសម្រាប់បន្តការសិក្សានៅមហាវិទ្យាល័យ និងការសិក្សាយកអាហារូបករណ៍ ដល់សិស្សទើបតែបញ្ចប់ការប្រឡងសញ្ញាបត្រទុតិយភូមិឆ្នាំ២០១៨ សរុបប្រមាណជា១០០ ក្រុមយុវជនដើមត្នោតបានរៀបចំ វេទិកាពិភាក្សាតុមូល និង សំណួរ-ចម្លើយមួយ ពាក់ព័ន្ឋទៅនឹងការតម្រង់ទិសនៃការសិក្សាជំនាញ និង ការងារទៅថ្ងៃអនាគត ដោយមាន វាគ្មិនសំខាន់ៗ ៣ រូបចូលរួមធ្វើបទបង្ហាញ និងផ្ដល់ការពិភាក្សា ក្នុងនោះក៏មានការបកស្រាយ ថាតើគួររៀនតាមចំណង់ចំណូលចិត្ត ឬ គួររៀនតាមតម្រូវការទីផ្សារ។
មានប្រសាសន៍ក្នុងកិច្ចពិភាក្សានេះ លោក ហឿន សំនៀង នាយករងខុទ្ទកាល័យរដ្ឋមន្រ្តីក្រសួងសាធារណការនិងដឹកជញ្ជូន ជាអតីតនិស្សិត សិក្សាបញ្ចប់ថ្នាក់អនុបណ្ឌិតពីសាកលវិទ្យាល័យ ហាវើតសហរដ្ឋអាមេរិក និងជាវាគ្មិន បានបង្ហាញនូវការគាំទ្រ និងចូលរួមសហការយ៉ាងពេញទំហឹង ចំពោះការផ្តួចផ្តើមរបស់ក្រុមយុវជនដើមត្នោត លើការរៀបចំសិក្ខាសាលានេះ ដោយលោកវាយតម្លៃថា នេះគឺជាជំហាននៃគំនិតដ៏ជឿនលឿន ក្នុងបំណងចង់ឲ្យយុវសិស្សបានស្វែងយល់អំពីការកំណត់គោលដៅនៃជីវិត ការត្រៀមខ្លួនមុនចូលសាកលវិទ្យាល៍យនិងអាហារូបករណ៍ ពិសេសនោះគឺផ្សព្វផ្សាយការស្វែងយល់ អំពីការសិក្សាជំនាញនិងការងារ សម្រាប់ថ្ងៃអនាគត។
លោក ហឿន សំនៀង បានផ្តល់គំនិតល្អៗជាច្រើន ដោយលោកលើកឡើងថា៖ជីវិតយើងម្នាក់ៗ ត្រូវកំណត់គោលដៅឱ្យច្បាស់លាស់ ដែលនេះជាកត្តាសំខាន់ ដើម្បីកំណត់គោលដៅបាន ជាដំបូងយើងត្រូវ ស្គាល់ខ្លួនឯងឲ្យបានច្បាស់លាស់ត្រូវបំពេញតួនាទីជាកូនល្អ ពលរដ្ឋល្អមានកត្តញ្ញូចំពោះគ្រួសារ និងសង្គមជាតិ ត្រូវដឹងអំពីសាវតាក្រុមគ្រួសារ និងត្រូវសិក្សាពីសង្គមឱ្យបានច្បាស់លាស់ផងដែរ ។
ព័ត៌មានជាតិ ថ្មីៗ
លោកបន្តថា៖យើងត្រូវរិះរកវិធីសាស្ត្រដើម្បីសម្រេចគោលដៅ ដោយប្រើប្រាស់សមត្ថភាពចំណេះដឹងផ្ទាល់ខ្លួន សេពគប់ និងទំនាក់ទំនងសុំពិភាក្សា ជាមួយរៀមច្បងដែលមានបទពិសោធ ហើយដើម្បីឈានទៅសម្រេចគោលដៅបាន យើងត្រូវពុះពារគ្រប់ឧបសគ្គ ធ្វើជាមនុស្សល្អ ធ្វើជាមនុស្សដែលមានប្រយោជន៍សម្រាប់សង្គម ប្រើឱ្យអស់សមត្ថភាពចំណេះដឹងរបស់យើង។
លោក ពុយ គា ក្រុមប្រឹក្សាភិបាលនៃសាកលវិទ្យាល័យអាមេរិកកាំងភ្នំពេញ ( AUPP ) ជាអ្នកឆ្លើយឆ្លងព័ត៌មាន នៃទីភ្នាក់ងារសារព័ត៌មានជប៉ុន ក្យូដូ ប្រចាំទីក្រុងភ្នំពេញ និងជាវាគ្មិន បានមានប្រសាសន៍ថា៖ ដើម្បីទទួលបានជោគជ័យក្នុងជីវិត ការងារ និងការសិក្សាផ្សេងៗ យើងត្រូវកំណត់គោលបំណងឱ្យច្បាស់ សិក្សាពីចំណង់ចំណូលចិត្តខ្លួនឯង ពិនិត្យមើលលទ្ឋភាពថវិកាផ្ទាល់ខ្លួន និងគ្រួសារ ស្វែងយល់ឱ្យបានលំអិតពី សាកលវិទ្យាល័យ ឬទីផ្សារការងារ ដែលយើងចង់សិក្សា និងចង់ធ្វើ ស្វែងយល់ពីអាហារូបករណ៍ បើខ្វះលទ្ឋភាពគឺត្រូវស្វែងរកការងារក្រៅម៉ោងសិក្សា ជាដើម។ល។
លោកបន្តថា៖ដើម្បីសម្រេចគោលដៅ និងគោលបំណង ក្លាយជាសិស្សពូកែ និងជាមន្ត្រីមានសមត្ថភាព យើងត្រូវប្រើប្រាស់ពេលវេលាឱ្យមានប្រយោជន៍ ត្រូវគិតគូរពីសុខភាពផ្ទាល់ខ្លួន ព្រមទាំងត្រូវព្យាយាម ស្តាប់និងកត់ត្រានូវរាលគន្លឺះសំខាន់ៗពីក្នុងវេទិកានានា និងកំណត់ឱ្យច្បាស់នូវប្រធានបទដែលយើងត្រូវសរសេរ។
លោក អៀង សុធារ៉ា អគ្គនាយកក្រុមហ៊ុន អៀង គ្រុប ប្រធានសមាគមន៏ពាណិជ្ជកម្មនិងវិនិយោគកម្ពុជា-ជប៉ុន ( CJBI ) និងជាវាគ្មិន បានក្រើនរំលឹកថា ៖ ដើម្បីអនាគត ប្រយោជន៍ខ្លួនឯង គ្រួសារ និងសង្គមជាតិ បើទោះជាមានការប្រែប្រួលគោលដៅនៃជីវិត តែមិនត្រូវបានប្រែប្រួលប្រាសចាកគុណធម៌នោះឡើយ ត្រូវតែជាមនុស្សល្អ និងជាមនុស្សដែលមានប្រយោជន៍ ត្រូវចៀសវាងការធ្វើខ្លួនឲ្យក្លាយជាមេរោគនៃសង្គម ។ យើងត្រូវចេះផ្លាស់ប្តូរ បត់បែន និងសម្របខ្លួន ជាមួយបរិបទសង្គម ទន្ទឹមនឹងនោះត្រូវព្យាយាមសិក្សាពីស្ថានភាពទីផ្សារការងារ និងកុំភ្លេចសិក្សាពីចំណង់ចំណូលចិត្តរបស់ខ្លួនឱ្យបានប្រាកដប្រជា យើងកុំសម្លឹងខ្ពស់ហួសសមត្ថភាព និងក៍មិនត្រូវមើលទាបពេកនោះដែរ ពោលគឺត្រូវថ្លឹងថ្លែងឱ្យសមភាពទៅនឹងសមត្ថភាព ចំណេះជំនាញ និងចំណង់ចំណូលចិត្តរបស់យើងរៀងៗខ្លួន។
អត្ថបទ និង រូបថត ៖ លោក យូ វង្ស លោក ងិន គឹម ឡេង និងលោក ជា ស្រស់
កែសម្រួលអត្ថបទ ៖ លោក សេង ផល្លី
